Aizawl: Sericulture Minister Lalthansanga chuan Directorate of Sericulture, Chaltlang atangin Keifang leh Mualphenga bana kaih scheme hnuaia kuthnathawktu chhungkaw 60 te tana hman tur, Muga Project atana Som (bul) tiak 16,000 a vai liam.
He hmalakna hi Sericulture department leh Mizoram Khadi & Village Industry Board (MKVI) te joint venture niin, Rs vbc 4.9 senna a ni a. Saitual District-a Keifang leh Mualpheng kuthnathawktu thlan bik chhungkaw 60 te hian pakhatin tin khat hmun, Som tiak 650 theuh enkawlin bul an tan dawn a ni.
Minister Lalthansanga chuan, ZPM sorkar chu mipui tana ding, Kalphung thar mipui sorkar a nih rualin, loneitu rethei leh ram nei lo te dawmkan chu an duh ber a nih thu a sawi.
MKVI Board Chairman C. Lalremliana pawhin Guwahati atanga lak luh he Som tiak hi a hmunah endik vek a nih thu leh, sorkarin thil a tih tak tak zia tarlangtu a nih thu a sawi bawk.
Muga pangngang chaw tur Som tiak hi kum thum chhungin a puitling hman tura ngaih a ni a, multi-cropping anga kalpui zui tur a ni. Muga pangngang cocoon hi a hluin a to hle a, kg khat Rs. 30,000 – 40,000 inkar te a ni phak a, thla khat tling lovah a cocoon hi a thar theih a ni.