Aizawl: PHE Minister Prof. Lalnilawma chuan Mizoram sorkarin Aizawl khawpui tui harsatna sutkian nan leh hmar lam bial tuam turin PHE Department kaltlangin hma an lak mek thu a sawi a. Aizawla tui harsat chhan Assam Rifles-te ni khata litre 45,000 chu sorkarin phurritah an ngai lo tih a sawi.
Thawhtannia ZPM-in an party pisaa chhung inkhawmah thu sawiin Prof Lalnilawma chuan Phase III tui lakna tur hian Setlak atangin Laipuitlangah tui pump chhoh a ni dawn a. Tunah hian Laipuitlang atanga Bawngkawn inkara kawngpui lai chhiain tui pipe phum hna zawh fel a ni tawh a, kawngpui pawh siam that leh vek a ni tawh a. He hna hi zawh a nih hunah chuan Aizawl khawpuiah tui a hnianghnar tawh tura ngaih a nih thu a sawi.
PHE minister chuan Aizawla tui harsat chhan sorkar leh Assam Rifles-ten inremna (MoU) an ziak chungchang sawifiahin, ni khata tui litre 45,000 pe tura inrem a nih thu leh, hei hi sorkar chuan phurritah ngai lovin an tih theih tur reng a nih avanga inremna pawh siam an nih thu a sawi.
Tuna hmalakna kal mekah hian Laipuitlang atanga pipe chhuak thla hian chhak lamah Durtlang leh Sihphir thlengin a tuam ang a, hmar lamah Zemabawk phei zelin Assam Rifles, Territorial Army leh Bungbangla thlengin a zawm thla dawn tih a sawi bawk.
Heng hnate hi vawi leh khata zawh nghal vek theih a nih loh thu sawiin Prof Lalnilawma chuan, sorkar chuan tha leh tlo taka kalpui a nih nan hma lak chhoh zel a ni tih a sawi a. Politics-ah hian chiang mang lo leh ziktluak lo va inbeihna a awm fo thin dan tih sawiin, tlin politics ringawt ni lo va, mipui tana hmasawnna tak tak thlentu tur ‘development politics’ chu ZPM chuan an kalpui ber tih a sawi.