Aizawl: Mizoram chhungah eirawngbawlna gas, LPG rate thar bithliah a ni a, June 1, 2026 atang khan hman tan a ni.
IOCL lamin gas man thar an tihchhuah angin, Mizoram chhung hmun hrang hranga LPG rate chu tihdanglam a ni a. Vairengte-ah hian domestic (14.2 KG) gas man chu Rs 1,056 a ni a, commercial (19 KG) chu Rs 3,584, 19 KG Xtra Tej chu Rs 3,606.50 leh 10 KG Composite gas chu Rs 756.50 a ni.
Vairengte tih loh Mizoram hmun dang zawngah erawh domestic (14.2 KG) hi Rs 1,065 a ni ang a, commercial (19 KG) chu Rs 3,598.50, 19 KG Xtra Tej chu Rs 3,621 leh 10 KG Composite gas chu Rs 766.50 a ni ang.
FCS&CA Department notification hmasa tar lan tawh angin, Aizawl Municipal Area leh District Headquarters hrang hrangah te ‘home delivery’ kalpui a nih tawh avangin domestic gas rate tar lanah te hian Rs 70 belh zel tur a ni a, Mizoram hmun dangah pawh home delivery kalpui a nih chuan heti zat bawk hian gas man a to ang. Amaherawhchu, gas hi godown atanga lak a nih chuan Rs 33.43 paih zel tur a ni thung a, home delivery kalpui theih lohna hmun, point delivery-a sem a nih erawh chuan Rs 7.53 belh thung tur a ni.
Sorkar thuchhuah dang angin, home delivery-a gas sem chhuah a nih hian 10 KG cylinder-ah Rs 70 belh zel tur a ni a, 5 KG cylinder-ah erawh Rs 20 belh thung tur a ni ang.
LPG Distributor tin te hian kum 2014 leh 2015-a sorkar thuchhuah lo siam tawh, khaw hlat zawng leh KM zat thila pawisa chawi belh ngai zat tar lanna order hmanga chhut chhuakin, an huamchhung khuaah te gas hi he rate thar dungzui hian an sem thin tur a ni.