Aizawl: Larsap General (Dr) Vijay Kumar Singh hovin Thawhtanni tlai khan Lok Bhavan Conference Room-ah, kumin June ni 4-a Shillong, Meghalaya-a North Eastern Council (NEC) Plenary vawi 73-na neih tur atana Mizoram inpuahchahnate an thlir ho.
Larsap chuan India hmar chhak state-te hmasawnna sorkar laipuiin a dah pawimawh thu sawiin, union home minister hova neih tur NEC Plenary-ah hian Mizoram hmalakna leh mamawhte tha taka thlen a nih theih nan line department hotute chu theihtawp chhuah turin a chah a ni.
He hunah hian Planning & Programme Implementation Secretary David Lalthantluanga’n powerpoint presentation hmangin, kum 2024-a Agartala-a NEC Plenary vawi 72-na thurel bawhzuina dinhmun leh Shillong atana inpuahchahnate a sawifiah a. Hemi bakah hian Mizoram chhunga NEC leh Ministry of DoNER hnuaia projects kalpui mek — NESIDS, PM-DevINE leh NEC funded project hrang hrangte bakah, Plenary-a Mizoram hamthatna tur thlen ram hrang hrangte an sawiho a ni.
He meeting-ah hian GAD Principal Secretary Sudhir Kumar leh department hrang hrang nena inremsiama thawkho Secretary leh official pawimawh te an tel a ni.