Aizawl: Union Minister of State for Information & Broadcasting leh Parliamentary Affairs Dr. L. Murugan chuan zan khat riaka Mizoram tlawh turin Thawhlehni khan Lengpui Airport a thleng a, I&PR Minister B. Lalchhanzova, ICT Minister Dr. Vanlalthlana leh sorkar hotu lianten hmuakin airport-ah meeting an nei nghal a ni.
Meeting-ah hian I&PR minister chuan Mizoram media, film industry, leh digital hmasawnna tura rawtna pawimawh tak tak union minister hnenah hian a thlen a. Mizo thalaite tana eizawnna thar a nih beiseina neiin, school 200 leh college 20-ah animation, visual effects, gaming leh comics (AVGC) content creator labs dinna tur sum ruahman sak turin a ngen.
NFDC leh FTII kaltlanga Mizo filmmaker-te tana training buatsaih sak te, kumin tira neih tak ‘Lemchan Film Festival’ chhunzawm leh ni nga chhung tala pawtsei tura hma laksak te, ram chhung leh khawvel huap film festival hrang hranga Mizo filmmaker-te an tel ve theih nana support pek chhunzawm zel a ngen bakah, hmarchhak state-te tana cinema theatre infrastructure chei that leh din thar nan scheme siamsak leh, Information & Broadcasting Ministry hnuaia 10% Gross Budgetary Support (GBS) dah hran atanga Mizoram sorkar project hrang hrangte sum sanction sak turin a ngen bawk.
Union minister pawhin heng mamawh leh rawtna an thlente chu tihhlawhtlin ngei a tum thu a sawi a, Mizoram film festival-ah pawh lo kal ve a châk thu a sawi.
Union minister hian nimin khan Kolasib district a pan nghal a, deputy commissioner leh official dangte nen review meeting neiin nizan khan Kolasib Circuit House-ah a riak a, vawiinah project site hrang hrang a tlawh chhunzawm ang.