Aizawl: Passenger phur chi lirtheia eizawng pawl pathum hruaitute chuan Thawhlehni khan Transport Minister Vanlalhlana a pisa-ah hmuin State Transport Authority (STA)-in ‘Mizotaxi Mobile Application’ hmantir a tumna chu sut leh turin an ngen.
Mizoram Taxi Association, Aizawl Two Wheeler Taxi Association leh Aizawl District Auto Rickshaw Owners Association hruaitute hian Minister an kawmnaah hian ngenna lehkha an pe a. An lehkhaa an tar lan danin May 29, 2026-a STA Secretary-in, June 1, 2026 atanga four-wheeler taxi, two-wheeler taxi leh auto-rickshaw ten he application hi hmang vek tura office order a chhuah chu mak an tih thu leh a barakhaih hle thu an sawi a. Application chungchanga inrawnna leh sawihona mumal pawh awm lova hman vek tura thupek a chhuak ta mai chu hriatthiam harsa an tih thu leh an pawm dawn loh thu tar langin order hi cancel-sak turin minister hi an ngen a ni.
Passenger phur lirtheia eizawngtute pawlte hian he application hman an duh lohna chhan hrang hrang an tar lanah kum tin application hman man chawi ngai tur leh mipuiten he application an hman man chhiah an chawi belh ve zel ngai tur chu tha an tih loh thu te, STA rate hman mek hi lirthei pawl hrang hrang hruaitute nena ennawn leh siam that hmasak a nih loh chuan application hmang nghal ngawt theih a nih loh thu te, tunlai khawvel thil man sang zelah thil dang man tihniam tura hmalakna awm si lova taxi leh auto-rickshaw-a eizawngte chunga hetiang ruahmanna siam a ni chu thlawp harsa an tih thu te leh he application hmang tura pawimawh ber internet network an la neih that tawk loh avangin lirtheia eizawng leh mipuite tan harsatna thlentu tur a nih thu an tar lang a ni.