Chief Minister Lalduhoma chuan khawvel hmaah Mizoram sawhthing chhawp chhuah a ni dawn tih a sawi.
Chief minister chuan Thawhlehni khan Youth Recreation Hall (YRC), Falkland-ah Mizo Ginger USP Mission Project, thlai chi hrang hrang tana Price Support Scheme leh NCEL Ginger Export Awareness Workshop te a rualin a hawng.
Thu sawiin Mizoram sawhthing hi a tê nain a quality a tha bik hle a, damdawia hmantlak a tlin thu a sawi a. A pulunga hralh ringawt lovin sawngbawl hnu ngeia hralh chu a hlawk zawk avangin leh leilung chhiat loh nana hma thar lak a nih thu a sawi.
“Ministry of DoNER kaltlangin sawhthing hi Mizoram ‘Unique Selling Proposition’ (USP)-ah puan a ni a, Sustainable Cultivation & Post Harvest Management Project siamin DoNER Minister Jyotiraditya Scindia chuan phur takin hma min lakpui a ni,” a ti bawk.
Chief minister chuan Post Harvest Management atan hian DoNER atangin Rs vbc 30.13 hmuh a ni a, sawhthing thar tamna Champhai district-ah pilot project angin processing unit changtlung tak pali din a ni dawn a. He project hian sawhthing chingtu chhungkaw 20,000 zetin chhawr tangkai a rin thu leh hna thar 100 vel a siam dawn tih a sawi.
Champhai-a a hlawhtlin chuan district dang tana sum pek leh pawh DoNER hian an inhuam tih sawiin Lalduhoma chuan, GI Tag hmang hian sawhthing oil-te siam chhuah tum a nih thu leh khawvel hmaah theh lar tura National Co-operative Exports Limited (NCEL) hruaitute chah chhuakin, vawiin (nimin)-ah export dan tur awareness workshop kalpui nghal a nih thu a sawi.
Hemi bakah hian sorkar laipui chuan kumin atan PM-AASHA hnuaiah ‘Price Support Scheme’ a siam a, Mizoram Arhar Dal, Nihawichi, leh Chhawhchhi te chu kumin tharchhuah atangin kalpui ve nghal a ni ang a. Thlai man tura bithliah (Minimum Support Price) te chu: Chhawhchhi kg khatah Rs 103.46; Arhar Dal kg khatah Rs 84.50 leh Nihawi kg khatah Rs 83.43 a nih thu a sawi.
Chief minister chuan heng thlaite hi National Agricultural Cooperative Marketing Federation of India (NAFED) leh Mizoram Agricultural Marketing Board thawkdunin collection centre an siam ang a, heng scheme kaltlanga hralhte chu Direct Benefit Transfer (DBT) hmangin lo neitute account-ah pawisa a lut nghal dawn a, middleman an awm dawn lo tih sawiin chief minister chuan, he MSP aia sanga hralhna hria an awm chuan zalen taka an hralh theih tawh thu sawiin, state sorkarin thlai thar pangaa MSP an pek hnuah central sorkar kaltlangin thlai dang pathum an pe leh dawn ta tih sawiin, “Lo neitute tan khua a var mek a ni,” a ti.