US sipaite chuan Iran lakah ‘mahni invenna’ beihpui an thlak a, lawng leh Gulf ramte kahna ballistic missile leh drone-te an kap thla niin an sawi.
Strait of Hormuz-a Qeshm Island-a beihpui thlakna hi ‘Iran-in Middle East pum beih a tumna chhanna a ni’ tiin US Central Command (Centcom) chuan a sawi.
Iran chuan phuba lakna atan ‘an chhehvel rama’ US base leh helicopter-te chu missile leh drone hmangin a bei tih a sawi ve bawk a. Centcom chuan Tehran hian Kuwait-ah missile pahnih leh Bahrain-ah missile pathum a kap tih a sawi a, heng missile-te hi kah chhiat leh kah thlak vek an ni.
Beihpui thlakna thar hi inkahhai pawh sei chungchanga inbiakna a chawlh laiin a ni a, kar tawp khan thla tam tak chhung indona titawp tura remna zawnga inbiakna chuan hma lam a pan thei lo.
Centcom chuan Qeshm Island-a beihpui thlakna hian Iranian sipai ground control station a beih thu a sawi bawk a, US sipaite chuan Iran-in ‘an chanvo anga tuipuia che vel civil mi’ lam hawia a kah attack drone pathum an kap thla bawk tih a sawi bawk.
IRGC chuan ‘Strait of Hormuz venhimna tihbuai hi tharum thawhtu US sipaiten a man to tak a pe dawn’ tih an sawi.
Centcom chuan Iran hian he biala ram hrang hrangte lam hawiin ballistic missile ‘eng emaw zat’ a kap tih a sawi a. “Kuwait hawia kah Iranian missile pahnih chu thleng pha lo leh a thlawh laia kah chhiat a ni a, Bahrain-a missile pathum kah pawh US leh Bahrain air defence force-ten an lo dang,” a ti.
Iran hian US military base awmna, Bahrain leh Kuwait-a an bitumte chu vawi tam tak a bei tawh a ni.
Hemi hma hian Centcom chuan Iran pana kal, tuialhthei phur lawng rual chu a kap bawk a, hei hi April 13 atanga Washington-in Strait of Hormuz-a Iranian lawng chawlhhmun a dan mek hmalakna zinga mi a ni.
US thlawhnain Botswana flag tar M/T vessel engine room-ah Hellfire missile a kap a, hei hi a thawktuten ‘vauna vawi tam tak pek an ngaihthah vang’ niin a sawi a. Centcom hian Thawhlehni khan lawng an kah lai video a tichhuak bawk.
March thla laihawl atang khan inremna siam a hnaih tawh thu sawi ni fo mah se US chuan Iranian nuclear programme telin thil hrang hrang avangin sawn zel a ni a. April thla tir atanga inkahhai kalpui a nih hnuah inbeihna tam zawk chawlhsan a ni mek a, kar liam taah inkap lehin tun tumah an inkap leh ta bawk.
US President Donald Trump-a chuan Iran-in nuclear ralthuam a neih theih loh chu a duh ber a ni a. Tehran erawh chuan nuclear bomb siam a tum lo va, a muanawm zawng chauhvin thil a kalpui a ni tih a sawi tawh thin.
February 28-a indona a intan atang khan mi sang tam tak an thi tawh a, Iran leh Lebanon-ah an thi tam zual a. Iran-in khawvel puma tuialhthei leh liquefied natural gas phurh hmun ngaa thena hmun khat kalna, Strait of Hormuz a khar avangin energy man a san phah hle bawk.
Israel leh Lebanese firfiak pawl, Hezbollah inkarah pawh buaina a chhuak zel a, kum 25 chhunga Israel-in Lebanon ram a dai thuk ber a ni tawh.
Thawhlehni khan Israel hian Lebanon chhim lama khaw hrang hrangah beihpui an thlak leh niin Lebanese thuneitute chuan an sawi a, US palainaa Thawhtannia inkahhai puan a nih hnuah pawh indona a la kal zel.
Inkahhai puanna thuthlungah hian Israel-in Beirut leh Hezbollah tamna Lebanese khawpui chhim lam dai an bei lo tur a ni a, Iran nena inzawm pawlin Israel a beihna a titawp ve dawn bawk.
Inkahhai puan hian awmzia nei rih lovin Lebanese tam tak a tithlamuang chuang lo va, mi maktaduai 1.2 chu hmun himah an insawn tawh a. Beirut chunga Israeli drone ri pawh Thawhlehni khan hriat tur a awm.