Indian khawpui, Delhi-a Malviya Nagar-a khualbukah Nilaini zing khan kangmei chhuakin mi 21 an thi a, mi 40 chuang chhanchhuah an ni bawk.
Kangmei hi zing dar 08.50 vela chhawng ngaa sang, Flourish Stay Hotel-a a hnuai bera thingpui dawra chhuak a ni.
Thuneitu pakhat chuan riahna leh tukthuan ei theihna khualbuk atanga kohna an dawn hnuah kang thelhna khawl pahnih, water bowser pahnih, quick-response vehicle leh kangmei venna unit dangte tirh nghal an nih thu a sawi.
Thil thleng lai hian building chhungah hian mi 40 vel an awm nia rin a ni a. Kangmei chhuah chhan hi hriat chian a la ni lo.
Video pakhatah chuan mi thenkhat chu an him nan building kang atangin an zuang chhuak tih a lang.
Hauz Rani kawngpui chep taka awm khualbukah hian pindan 25 vel a awm a. Khualzin 40 vel a awm nia sawi a ni a, heng zingah hian ram dang mi, damdawi in pante pawh an tel.
Kangmei chhuah lai hian mikhual tam zawk hi an muhil niin an sawi.
Khualbuka thingpui dawra ei siama thawk, Kesar Singh-a chuan an thil tawn chu a rapthlak hle tih a sawi a. Zing dar 8:00 vela electric stove tihnun a tum chu kangmei a chhuak nghal niin a sawi.
A hnu rei lo teah chuan khualbukah kangmei a chhuak tih a hre nghal tih a sawi a. “Ka thachhangdawltu hnenah khualbuk a kang tih ka hriattir nghal a ni,” a ti.
“Pawnah ka va chhuah chuan khualbuk pum chu a kang vek tih ka hmu nghal a. Engtin emaw ka tlan chhuak thei ta hlauh a ni,” tiin Negi-a chuan a sawi.
Prime Minister Narendra Modi chuan kangmei vanga thihna thleng chu thil lungchhiatthlak tak a nih thu sawiin thi chhungte tanpuina Rs. nuai 2 pek a nih tur thu a puang.
“An hmangaih tak takte boralte ka tawrhpui tak zet a. Hliam tuarte dam thuai duhsakna ka hlan a ni. Thuneitute chuan a tuarte tanpui nan theihtawp an chhuah mek a ni,” tiin X-ah a tar lang.
Hliam tuarte hi hi kanna Rs 50,000 pek an nih tur thu a sawi bawk.
Delhi Chief Minister Rekha Gupta-i pawhin thihna a thleng chu pawi a tih thu a sawi a. “Thi chhungte ka tawrhpui tak zet a. Hliam tuarte dam thuai turin ka tawngtai a, he lungngaihna lungchhiatthlak tak tuar zawng zawngte tan chakna leh huaisenna ka dil a ni,” tiin X-ah a tar lang.
He thil thleng chungchanga thu hriat a nih veleh Delhi Fire Services, Delhi Police, DDMA, CATS Ambulance Services leh emergency response agency dangte chu tangrualin chhanchhuah leh chhawmdawl hna an thawk nghal niin Gupta-i chuan a sawi.
“An chetna rang tak hian a nghawngna hmun atanga mi eng emaw zat chhanchhuah leh chhuahtirnaah a pui a ni,” a ti a. Delhi sorkar chuan thil awm dan chu a vil reng thu a sawi bawk.
“Damdawi thila puihna leh thlawpna chu chhungkua te hnenah pek a ni a. He lungngaihna darkar karah hian Delhi sorkar hian a tuar chhungte kiangah nghet takin a ding a. He thil rapthlak tak tuarte tan hian a theih ang anga tanpuina pe turin kan inpeih reng a ni,” a ti.