Zoram People’s Movement (ZPM) chuan thla thara Mizoram Rajya Sabha MP thlanna neih turah an party candidate atan K. Laltluangkima an thlang chhuak.
Nilaini chawhma dar 11 khan ZPM pisa, Republic Vengah ZPM Vice President C. Lalnunnema chuan an party candidate atan K. Laltluangkima, PAC Member Secretary leh spokesperson ni lai chu ZPM Rajya Sabha MP candidate a nih thu hi a puang a ni.
C. Lalnunnema chuan June 2, 2026 zan khan Chief Minister Lalduhoma hovin a bangla-ah ZPM Rajya Sabha MP Nomination Committee an thukhawm a, lungrual takin K. Laltluangkima hi an pawm tlan thu a sawi a. Candidate tur mi tha tam tak karah harsatna hmachawn lova tluang taka thutlukna an siam thei chu lawmawm a tih thu a sawi bawk.
Candidate atana puan thar, K. Laltluangkima pawhin thu sawiin party hruaitute leh nomination committee chungah lawmthu a sawi a. “Mizoram hian Rajya Sabha MP pakhat chauh kan nei a, kum ruk term a ni a. Hemi chhung hian kan ram tana kan tih theih chin ang zawng zawng chu tih kan tum ang,” tiin theihtawp chhuaha hna thawh a tum thu a sawi.
ZPM hmasawnna chu chief minister, minister leh MLA-ten rinawm taka ram an kaihhruai vang a nih thu a sawi tel bawk.
K. Laltluangkima hian Ningani hian nomination a file dawn a ni.
Election Commission of India (ECI) chuan June 1, 2026 khan he thlanna tur atan hian notification a lo tichhuak tawh a. Hming pek theih hun tawp chu June 8, 2026 niin inthlan hi June 18, 2026 (zing dar 9 – tlai dar 4)-ah neih tur niin vote thlak ni vek hian vote tlate chhiar a ni ang.
K. Laltluangkima hi October 16, 1963 khan Saitualah a piang a, a pa chu Upa Tlanghmingthanga (L), a nu Darngeni niin, Vanlalruati Khiangte nen kum 1990-ah an innei a, fa hi mipa pahnih leh hmeichhia pahnih an nei a ni. Tunah hian Mission Veng, Aizawlah an cheng mek a ni.
St.Anthony’s College atangin Bachelor of Commerce a zo va, Trinity & All Saint College, Leeds atangin Christian Communication Studies a zo bawk a. Maryland, USA atangin Master of Plumbing a zo leh bawk.
Kum 12 chhung Synod Electronic Communication Department-ah manager hna a thawk a. Mission Veng Branch KTP-ah OB post lo chelh kim vek tawhin Synod tihchhuah Kristian Naupang chanchinbu chu a bul tantu niin, Mission Veng Branch YMA-ah president a lo ni tawh bawk.
Kum 1997-ah khan MNF (Nationalist), a hnua ZNP party ni ta hi a zawm a. CCF kaihhruainain kum 1998-ah khan Bilkhawthlir bialah MLA candidate a ni lo ni tawh a. Tunah hian ZPM Party-ah committee sang, PAC Member Secretary leh spokesperson nihna a chelh mek a ni.