Kumin nipui bazarah Enzo Fernández-a’n chhuah a tum lui a nih chuan Chelsea chuan a man atan £ maktaduai 120 vel an phut dawn tih ESPN in thudawnna an neih atangin an tar lang.
Premier League-ah Chelsea-in 10-na dinhmun hauhin season thara Europe inelnaa an tel theih dawn tak loh avangin kum 25 mi hian awm zel dan tur a ngaihtuah mek niin hriat a ni.
World Cup zawhah Chelsea chuan pre-season training nei turin an beisei thu a tar lang a; mahse, Fernández hian chhuah a dil mai dawn niin sawi a tam hle.
Argentina international hian Blues-ah hian kum 2032 thleng contract a nei a, hetiang player pawimawh hi chân an phal lo hle a ni.
A beiseitu club eng pawhin February, 2023-a Chelsea-in Benfica atanga an leina man, £ maktaduai 107 chu an khum a ngai ang.
Real Madrid chuan Fernández hi an ngaihven hle a; mahse, a man an chhiar to lutuk chu harsatna a ni a, club president a nih dawn bawk avangin an player lak dan tur a chian loh phah bawk a. Manchester City pawhin he thil thleng mek hi an thlithlai ve reng bawk niin an tarlang.
Chelsea hian sum lamah harsatna neih vanga hralh tur ni lo mah se Fernández atanga sum an hmuh hian manager thar, Xabi Alonso-a hnuaia team siam that nan a pui dawn a. Tun dinhmunah hian Alonso leh Fernández te hi an inbia em tih a la hriat loh.
Fernández hian Chelsea tan Premier League-ah vawi 117 a khel a, goal 19 khungin a thiante thun tur vawi 17 a siamsak tawh a ni.