Rajya Sabha-ah Mizoram chuan seat khat neiin, tuna kan MP ni mek chu K. Vanlalvena a ni tih kan hre theuh awm e. Mahse, a term a lo tawp ve dawn ta reng mai a, tunah hian MP thar tur ruahmanna a awm chho leh mek.
Election Commission of India (ECI) chuan June 1 khan inthlanna awm tur thu hi notification a lo chhuah tawh a, chuh tumte tan hming pek theih hun chu June 8, 2026 thleng niin, vote thlak ni chu June 18, 2026 (zing dar 9 – tlai dar 4) a ni dawn a, vote tlate hi chhiar nghal a ni dawn a ni.
Rajya Sabha MP tur hi kan aiawha MLA kan thlanchhuahte chuan thlangin, vote an thlak dawn a, a lan dan maiah chuan state-a rorel lai ZPM party vawrhchhuah chu tling chiang tura ngaih niin, anni party hian K. Laltluangkima an din tur thu hi nilaini khan an lo puang tawh bawk. Party dang erawh an la ngawi thung.
Engpawhnise, kan aiawha India ram rorelna in sanga thu tur an ni a, tute pawh lo tlingin, lo MP se mipuite hian a hma lama lo awm tawhte nen kan khaikhin lo thei dawn lo a, ram mipuite aiawh zoin a khawsa em tih thlengin kan chik chho hle dawn a ni.
Hun hmasa lamah Lok Sabha leh Rajya Sabha-ah hian MP kan lo nei nual tawh a, thenkhatte chu MP ngawireng tia sawi kumtluan niin, an bang duh chuang bawk si lo a, ram mipuite tan zahthlakna chin leh duhkhawp lohna a lo nasa hle tawh thin.
MP thar kan nei hnai leh ta a, ram mipuite innghah ngamna, hnamdang karah pawh tho thang tha tak leh a serh zinga a mei ang an sawi thin anga che ve sek thei, zahpuiawm lo ni ngei turin kan aiawhtu chu inbuatsaih mawlh teh se.