Aizawl: MPCC President Lal Thanzara’n ZPM kaihhruai sorkar kal dan uluk takin an hotuten an thlir mek a, document fel tak nen law court-a kalpui turin ruahmanna an siam mek thu a sawi.
Aizawl District Congress Committee (ADCC) Area Block President Joint Committee thutkhawm chu Nilaini khan Lal Thanhawla Auditorium, Congress Bhavan-ah neih a ni a. He hun hmanpuitu MPCC President Lal Thanzara chuan Congress Block President-te chu mahni hmasial lova khawtlang leh kohhran thiltihnaa tel tam a, mipuite tana theih tawp chhuah tura fuihin, tihtakzeta bial hna an thawh chuan kum 2028-ah Pathian hruaina mipuiah Congress a sorkar leh ngei dawn tih a sawi.
Lal Thanzara chuan MNF-in Independence an sual laia Mizoramin hrehawm a tuar thin kha Congress Party chauhvin a chhanchhuak a, Lal Thanhawla leh a thawhpuite bakah, Laldenga hoten inremna an pawm avanga ram chhunga remna lo awm chu central leh Mizorama Congress sorkar vang a ni tih a sawi a. Tuna Burma leh Meitei unaute buaina laka Mizoram la him chu lawmna chang hriat a tul thu a sawi.
Politics-a tawngkam thiam vanga thangtharten engmah thawkchhuak lova Congress an puh chu pawi a tih thu sawiin, Congress hun lai khan NLUP hmangin kuthnathawkte leh miretheite an chawmkan bakah, sorkar hnathawkte pawh zalen takin an awm thin a ni, a ti.
Tuna sorkar mek hmalakna, a bik takin MUCHS kalpui dan chu mipui tana phurrit a siam dan tur ngaihtuah a ngai a ti a; he sorkar hmalakna hi uluk taka an hotuten thlirin, corruption laka fihlim anga insawi mah se, document fel tak nen Law Court-a kalpui turin ruahmanna an siam mek tih MPCC President hian a sawi.