Aizawl: Tun hnai ni hnih chhung khan Saitual Police leh Champhai Police-te chuan hmun hrang hrangah ruihhlo, tual chhung rate-a Rs vbc 2 leh a chanve dawn hu zet an man.
Thawhlehni khan Saitual Police chuan Keifang khaw daiah Manipur atanga Aizawl pan lirthei pakhat (UP32 NZ6396) chu an lo tiding a. Uluk taka an enfiah hnuah a chhunga thuhruk, Opium fluid ni ngeia hriat bawm 71 lai an hmuchhuak a ni. Heng ruihhlo an man hi a rih zawng kg 45.871 a ni a, tualchhung rate-ah Rs vbc 2.29 zet hu a chhut a ni.
He thilah hian ruihhlo phurtu Rajasthan mi pahnih — Somraj (36), s/o Ramrakh Ram, Jodhpur, Padiyal leh Kailash (28), s/o Mohan Ram, Narsing Nagar, Dhawa-1, Jodhpur-te chu man nghal an ni a. Saitual Police Station-ah ND&PS Act tlawhchhanin thubuai ziah luh a ni a, chhui zui mek a ni.
Thawhtanni khan Champhai Police Khankawn Check Gate-a duty-te chuan Champhai atanga Aizawl pana tlan lirthei pakhat lo tidingin an enfiah a. He lirthei passenger pakhat Vanlalnghaka (36), Tualcheng khua, tuna Vengsang, Champhai District-a khawsa mek bag chu an rinhlelh avanga an dapnaah, Reebok pheikhawk sen chhunga thuhruk Heroin hawng hnih an hmuchhuak a ni.
He Heroin an man hi gram 29 a rit a ni a, tualchhung hralhna rate-ah Rs 5,80,000 hu tura chhut a ni. He thil thleng chungchangah hian Champhai PS-ah NDPS Act tlawhchhanin thubuai ziah luh a ni bawk.