Aizawl: ONE Championship-a hnehna changtu, Nazareth Lalthazuala chu Sports Minister Lalnghinglova Hmar-in lawmpuina a hlan a. Combat sport tihhmasawn nan Rs vbc 38.4 hman a ni dawn tih a sawi.
Kumin June 5-a Bangkok-a One Championship Friday Night Fight-a hnehna changtu, Nazareth Lalthazuala, Phuaibuang khua chu sports minister chuan a pisa-ah lawmpuina hun a hmanpui a, sports department leh SYS hotute nen lawmpuina thilpek an hlan.
He hunah hian minister chuan Nazareth-a hlawhtlinna chu thalaiten entawn se a duh thu sawiin, “Tunah chuan hriat hlawh a lo ni ta a, a hma aiin invawn uluk a ngai sauh dawn a ni,” a ti a. Mizoram State Mixed Martial Arts Association (MISMA) chu Mizoram State Sports Council-ah an la affiliate lo tih sawiin, hma sawnna tur thlir chunga ruahman dante sawiho a nih tur thu a sawi.
Sports minister chuan India ramin 2036 Olympic thlen a tum thu leh Zofate pawh tel ngei thei tura hma lak a nih thu a sawi a. Mizote theihna lai bik Combat sport lam thlur bing turin NESIDS (ORTRI) atangin Rs vbc 38.4 hmuh a nih tawh thu leh, he sum hmang hian Aizawl-ah Boxing Center of Excellence din a nih tur thu a sawi a, he hmunah hian combat sport dangte pawh an tel vek dawn tih a sawi bawk.