Directorate of North Eastern Region NCC hnuaia NCC Group Headquarters, Aizawl Mizoramin a thlen, ‘National Cadet Corps Inter-Group, Pre-Subroto U-17 Girls Football Tournament’ chu Nilaini khan Rajiv Gandhi Stadium, Mualpui-ah Home Minister K. Sapdanga’n a hawng.
Hawnna inkhawmah home minister chuan hmarchhak state hrang hrang atanga inkhel tura kalte chu Mizoram aiawhin lawmthu a sawi a; hmarchhak state-te chu India ram pum pui ang pawha footballer tha tak tak chher chhuak thintu an ni tiin, India ram mai pawh ni lo, ram pawn thleng pawha inkhel thiam tirchhuak zel theitu ni tura theihtawp chhuah turin tournament-a inkhel tura kalte chu a chah.
NCC-in hetiang tournament tha tak a buatsaih chu lawmawm a tih thu sawiin home minister chuan, hmeichhe inkhel thinte tana kawng hawnsaktu pawimawh tak a nih thu a sawi a. Football khel tura quality pawimawhte chu NCC kalphung nen pawha inmil tak a nih thu sawiin, inelna a nih rualin inunauna tha zawk siam nana hun hmang tel turin inkhel turte a chah a ni.
Minister hian torunament trophy leh medal a tlangzarh nghal bawk.
He Pre–Subroto Cup-ah hian Silchar, Aizawl, Kohima, Jorhat, Guwahati, Shillong, Tezpur leh Dibrugarh Group te an inel dawn a. June 17-ah final khelh a ni ang a, team champion hian kumin August ni 18 leh 31 inkara International Subroto Football Cup khelh turah NCC team aiawhin an chhuak dawn a ni.