Formula 1 Las Vegas Grand Prix chu kum 2037 thleng chhunzawm turin kum 10 chhung atan inremna thar an ziak.
Las Vegas panna kawngpui hi kum 2023 khan intlansiakna hmun atan hman tan a ni a. A hmaa an inremna ang chuan kum 2027 thleng chauh a ni a; mahse, Clark County chuan kum 2032 thleng tal tlan chhunzawm kha an lo tum lawk tawh hrim hrim a ni.
Inremna thar an siam takah chuan hun lo la awm zel turah USA hian Formula 1 intlansiak hi a tlem berah hmun thar pathumah a thleng dawn tihna a ni a. Austin, Texas-a United States Grand Prix chu nikumah khan kum 2034 thleng atan pawh sei a lo ni tawh a, Miami Grand Prix pawhin kum 2041 thleng daih inremna an nei bawk.
Las Vegas intlansiakna hmunah hian F1 tana bik liau liaua siam, ‘Grand Prix Plaza’ a awm a, hei hi acre 39-a zau, thil hrang hrang tih nana hman theih a ni.
Formula 1 hian mi mal leh pawl hrang hrangte kuta pe lovin a thlengtu leh a buatsaihtu hna a thawh kawp vek avangin he intlansiakna hmun hi a danglam bik riau a ni.
F1 hotu, Stefano Domenicali chuan he intlansiakna hmun hi tun hnaia an an hmun zinga langsar ber pakhat a tling tawh tih a sawi.
Domenicali chuan, “Las Vegas khawpuiah kum tam tak Formula 1 an la tlan zel tur hi kan phur hle a. Kum 2023-a kan tan tirh phat atang khan he intlansiakna hi a namai lo hle a, intlansiak hmuhnawm, khawvel ram hruaitute leh mi larte hip khawmna hmunpui a ni nghal a. Tual chhung sum dinhmunah leh khawtlang nunah nghawng tha leh hlu tak a hnutchhiah a ni.
“Las Vegas hi US-a kan hmunpui pawimawh tak a la ni dawn tih kan ring sa reng a, tun hnaia kan hlawhtlinna nena thlir hian he hmun kan ngaih pawimawhzia a tar lang nawn leh a. Hma lam hun hi a phurawm khawp mai, he intlansiakna hi lar zual zel turin kan duh a ni,” a ti.
F1 leh Las Vegas hian intlansiak an neih hnu atanga sum leh pai lama hlawhtlinna an neih hnemzia hi an sawi lang zing hle a. Sorkar chhiah luh dan chhinchiahnaah pawh nikumah pawh khan state leh tual chhung sorkar tan chhiah atangin $ maktaduai 43 an hmu.