US leh Iran thuneitute chuan an indona tihtawpa Strait of Hormuz hawn leh tura inremna an siam thu an sawi a. Hei hian khawvel pumah tuialhthei man a a tihniam nghal a, Tehran-in nuclear program a kalpui dan turah an inbe zui bawk ang.
Tuna mi hi a ruangam mai chauh la ni mah se February thlaa US-Israeli-in Iran an beih avanga mi sang tam tak thihna leh energy sumdawnna a tihbuai mek chin felna tura hmasawnna lian ber a tling.
US President Donald Trump-a chuan Truth Social-ah Pathianni tlai dar 5:30 vel khan, “Islamic Republic of Iran nena deal siam chu a zo tawh a ni,” tiin a tar lang a. A tar lan hun hi Washington-ah chuan Pathianni (India-ah Thawhtanni zing dar 03:00) a ni a. President-in a tar lan hi palai hna thawktu, Pakistani Prime Minister Shehbaz Sharif-a’n a ram huna Thawhtanni zingah inremna siam a nih thu a puan hnu lawk a ni.
Memorandum of understanding hi Zirtawpni hian Switzerland-ah official-a ziah tum a ni.
An inrem dan mumal tak hriat a la ni lo va, Sharif-a chuan X-ah inremna hian ‘Lebanon pawh tiamin, hmatawng zawng zawnga sipai chetna tihtawp’ a phut thu a sawi.
Indonaah hian Lebanon chu buaina chhuah zui nasatna ber a ni a, March 2-a Tehran thlawpna atana Israel lama silai hmet puaktu, Hezbollah laka Israel-in beihpui thlakna avangin mi sang tam tak thi leh mi maktaduai 1.2 vel an in leh chhuahsan an awm tawh.
Tun hnai chawlhkar eng emaw zat chhung khan Israel leh Hezbollah hian Trump-a leh mi dangten an inbeihna tihtawp tura an ngenna an ngaihsak lo.
Iran Supreme National Security Council secretariat chuan Lebanon telin kawng tinrenga indona leh sipai beihna chu Thawhtanni zan atangin a tawp vek dawn tih a sawi.
Iranian Foreign Minister Abbas Araqchi-a chuan Israel-in Lebanon a beih mek chu tihtawp vek a ngai tih sawiin, inremna ruangama lang kalpui dan tur chu US mawhphurhna a nih thu Telegram-ah a tar lang.
Lebanese parliament speaker, Hezbollah tantu, Nabih Berri-a chuan he inremna hian he biala venhimna leh muanna tur lungphum a phum a, Lebanon pawh a tel tih a sawi.
Israeli Prime Minister Benjamin Netanyahu chuan inremna chungchangah hian engmah sawi a la nei lo va. Defence Minister Israel Katz-a chuan Israel chuan Lebanon chhim lam a luah mek atanga an sipaite chhuahtir tura nawrna chu a dodal dawn tih a sawi tawh thung.
Trump-a chuan khawvel puma tuialhthei leh boruakalhthei phurhna lawng kawng pawimawh, Iran-in thla tam tak a khar tawh, Strait of Hormuz chu Zirtawpniah hawn a nih tur thu a sawi a, US-in Iran lawng chawlhhmun a kharte tihtawp a nih thu a sawi bawk.