Arsenal chuan Mikel Arteta chu contract thar ziahpui tumin hma an la dawn hnai a, an puitlin a nih chuan khawvela football manager hlawh hnem ber berte zingah a awm thei dawn.
Spanish coach hian Premier League-a coach hlawh hnem ber nihna a chelh thuai dawn a ni.
Kar kaltaah khan Arteta contract thar chungchanga inbiakna hi tluang taka kalpui a ni tawh a, season thar intan hmain inremna hi tifel hman ngei turin an ring.
Arsenal thuneitu liante chuan Arteta hma lam hun tihfel vata a hruaina hnuaia hmasawnna ropui tak an neih tawh lakah lawmman pek hi an lo rilruk reng tawh a . Tunah hian heng an thil ruahmante hi a puitling tep a, club neitu, Kroenke chhungkua pawhin an thlawp a ni.
Arteta contract neih laiah hian thla 12 chauh a awm tawh a, season khatah £ maktaduai 10 vel a hlawh mek a. A contract thar turah erawh a hlawh zat chu tuna a hlawh let hnih deuh thawa tihpun a ni dawn a. Ruahmanna tharah hian chawlhkar khata £3,84,000 zet a hlawh thei dawn niin an sawi.
A hlawh thar tur hian Pep Guardiola hlawh a pha thuak dawn a, Guardiola hian Manchester City-ah kum khatah £ maktaduai 20 vel a hlawh thin a. Premier League-a hlawh hnem ber a la ni reng rih a, July 1-a City a chhuahsan hma loh chu a ni chhunzawm rih dawn a ni.
Chumi hnuah chuan, Arteta hi England-a manager hlawh hnem ber a nih rin a ni a, coach tha ber berte huangah a ding pha ve ang.
Chelsea boss thar, Xabi Alonso pawh Premier League-a hlawh hnem pawl a ni a, Arteta contract neih lai nen a inhnaih hle.
Club chuan Arteta contract thar hi December, 2019-a mawhphurhna a lak hnua club a thlak danglam nasat avanga lawmman pek tlak nia an hriat vanga zawrh an ni.