Spanish footballer Lamine Yamal chu UNICEF Goodwill Ambassador atan ruat a ni a, a naupang ber pawl a ni.
March, 2010 khan Lionel Messi pawh he chanvo chang tura ruat hi a lo ni tawh a, khawvel puma an hmingthanna leh thiltitheihna hmanga naupangte dikna chanvo hriatpui tura hma la thin infiammite zingah Yamal pawh hi a tel ve ta a ni.
Kum 18 chauh la ni mah se Barcelona player hian tlawmngai pawl nena an thawhhona thar hmang hian naupangten him taka an khelh leh hmasawnna hmun tha an neih theih nan hma a la dawn a ni.
June 11 khan International Play Day an hmang a, naupangte taksa, khawtlang nun leh hriatna lam hmasawnna atana infiamna pawimawhzia pharhna ni atan an hman bakah football inelna lian ber, 2026 FIFA World Cup intan hun a ni ve chiah bawk a. He mi niah hian Yamal chu UNICEF Goodwill Ambassador atan an ruat tih hi an puangzar ve chiah bawk.
UNICEF chuan Yamal-a hmalakna ber tur chu retheihna, indona emaw, mihring harsat thutna thleng vanga infiamna hmun remchang hmu lo naupang maktaduai tam takte dinhmun hriattirna lamah a ni ang tih an sawi.
Yamal chuan, “UNICEF Goodwill Ambassador ka lo ni ta hi ka lawm tak zet a ni. Naupang ka nih lai kha chuan chhungkua, ball khat, khelmual khat leh duhthusam chauh ka nei thin,” tiin a sawi.
“Football khelh hian nun kawng mumal min kawhhmuh a, khawiah emaw tel ve nia inhriatna leh hma lam hun atana beiseina min pe a. Naupangten him taka an infiamna hmun tur an neih pawimawhzia ka hria; tichuan, naupang nih hlimawmzia an tem thei ang a, khawvel zau zawk an dai ang a, suangtuahna an nei ang a, an lo thang lian thei dawn a ni. Hemi a nih lai hian, khawvel puma naupang maktaduai tam takte chu infiamna hmun him nei loin an sei lian mek a ni. Infiamna chanvo laksak an nih hian thiamna hrang hrang neih te, thian siam te leh hma lam hun duhawm zawk suangtuahna hun tha an chan zel a ni,” a ti bawk.
UNICEF-in data a tlangzarh danin khawvel pumah kum nga hnuai lam naupang maktaduai 90 chuangte chuan an inahte infiamna an nei lo a, kum hnih leh kum li inkar naupang maktaduai 80 dawnte chu an nu leh pa emaw, anmahni enkawltute nen emaw inah an infiam ngai lo bawk a, hei hian an hmasawnna pum a nghawng thei a ni.
He pawl hian Yamal-a’n thangthar zawkte nena inlaichinna tha a siam thei chu an fak hle a, kum 2024 atang tawh khan hetiang kaihhnawih kawng hrang hrangah an lo thawk ho tawh thin tih an tar lang bawk a. Chutiang bawkin, nausen a nih lai khan UNICEF calendar-ah Messi-a nena thlalak hriat hlawh tak an lo nei tawh bawk a ni.
Social media-ah follower maktaduai 87 chuang a neih avangin Yamal hian a hmingthanna chu naupangte dikna chanvo leh hmasawnna leh huam zau taka inpawhna atana hmanrua pawimawh tak infiamna kawng hrang hrangte chawi larna atan a hmang dawn a ni.
Lamine hian UNICEF hmalakna thar, naupangten infiamna dikna chanvo an neih humhalhna ‘Play for Every Child’ chu thlawp a tiam bawk a, hei hian intihhlimna, rimawi, infiamna leh video game lam industry te a huam tel a ni.