Aizawl: Republic Veng Branch YMA in Thawhtanni khan YMA Day vawi 91-na Community Hall No. 1-ah lawmna leh zirlai tithate chawimawina hun an hmang a. He hun hi Art & Culture Department Minister leh bialtu MLA ni bawk, C. Lalsawivunga chuan khuallian niin a hmanpui.
Khuallian C. Lalsawivunga chuan thu sawiin, “Khawvel huapa Mizo kan inphochhuah theihna awmchhun chu kan culture a ni a, kan hnam lam te, kan hnam zai te, kan hnam zia leh Mizo nihphungte uar zawka kan phochhuah a, kan zahpui loh a ngai a ni,” tiin, hemi rual hian zirna uar leh zual a pawimawh thu a sawi.
Bialtu MLA chuan, “Zu leh ruihhlo do zel ila, Kristian nun dan tha chawisang zelin YMA rilru pu a YMA tlat reng hi kan ram leh hnam humhalh nan leh hmasawn nan a pawimawh em em reng dawn a ni,” a ti.
Republic Veng Branch YMA Vice President, L. Ramdinliana Renthlei kaihhruai inkhawmah hian Republic Veng chhunga HSLC leh HSSLC Examination 2026-a ti thate chawimawina certificate leh lawmman hlan an ni a, Ward Corporator Lalremruati Sailo pawh chawimawina hlan a ni bawk.
Hemi ni hian Branch YMA huamchhunga Section hrang hrangten Mizo hnam lam intihsiakna hun an hmang a. Zingkarah section tinten vengchhung tihfai hnatlang neiin Branch hruaituten thlanmualah thing an phun bawk.