Aizawl: YMA Day pualin Kelsih Branch YMA leh tlawmngai pawl ‘Foundation For Drug-Free Mizoram’ chuan Thawhtanni khan ruihhlo that lohzia zirhona an buatsaih.
He hunah hian ruihhlo dona kawnga hmalakna hrang hrang thlirho a nih bakah, Kelsih Y.M.A member mi 106 ngawt mai ruihhlo laka fihlim turin an intiam thar a ni.
Ruihhlo that lohzia zirhona hawnna inkhawmah Foundation For Drug-Free Mizoram dintu, Vee Mathara chuan, “YMA leh Kohhran chu Pathianin Mizote min pek, mi zawng zawng lenna, a aiawh tur emaw a hen zo tur awm tawh chuang lo an ni,” a ti a. Mizote ram leh hnam an la awm chhung chuan kohhran leh YMA chu an innghahna lungphum a nih reng dawn thu a sawi a. Chutihrualin YMA member-te zingah vantlang titi leh social media-a YMA demna awka ri leh thin chu chin zui mawi lo tak a nih thu sawiin, ruihhlo do kawngah an pawl chuan YMA hmalakna an thlawp tlat thu a sawi/
He huna Resource Person, Lalhmingmawia pawhin thu sawiin, ruihhlo chuan mi mal, chhungkua leh khawtlang nun thui tak a khawih chhiat avangin ruihhlo do tura tanrual vek an mamawh tawhzia a sawi a. Ruihhlo laka la fihlim, entawn tlak tak tleirawl te chu an nun atana thutlukna dik an siam avangin hmahruai tha leh mi nihlawh an la nih tur thu uar takin a sawi bawk.