Aizawl: UD&PA Minister K. Sapdanga chuan, “Hmasawnna tehfung langsar ber chu faina hi a ni a, zahawmna tehfung pawh faina tho a ni,” a ti.
Chawnpui Branch YMA-in Thawhtanni chawhma dar 11-a YMA Day leh Aizawl City Area Branch YMA Fai Inelnaa pakhatna lawmman an dawn lawmna bakah tun hnaia UD&PA Department hnuaia Chawnpui veng chhunga hmasawnna hna hrang hrang thawh a nih avanga lawmthu sawina inkhawm an buatsaih ah thu sawiin K. Sapdanga chuan, kawngpui tha te, hmasawnna ruhrel man to pui puite engzat pawh awm mah se, fai taka enkawl an nih loh chuan hmasawnna tehfung an tling lo a ni, tiin, Chawnpui vengin kum 2025 chhunga veng fai ber lawmman an dawng chu a lawmpui a, Chawnpui veng chhunga sorkar officer lian ber berte tlawmngai pawl kaihruaitua an tang chu a fak bawk.
India ram puma faina beihpui thlakna Swachh Bharat Mission sawiin, kum 2047-ah India chu ram changkang (developed country)-a puan tlaka faitir turin sorkar laipuiin hma a la a, Mizoramah pawh khaw tinah chu beihpui chu kan lo zawm ve a ngai, a ti.
Khual zahawm TBC Lalvenchhunga, bialtu MLA pawhin thu sawiin, Chawnpui vengin sorkar atanga duhsakna a dawnte avanga lawmpuiin, chung hamthatnate avang chuan sorkar programme tihhlawhtlin kawngah hmahruaitu veng ni turin a ngen bawk.
He hunah hian khuallian leh khual zahawm te hian YMA Day puala inelna hrang hrang lawmman te an sem nghal a ni.