Aizawl: Sakawrdai Joint YMA buatsaih YMA Day Vawi 91-na chu GSA Khelmual, Sakawrdaiah hman a ni a. He hun hi MNF vice president leh Leader of Opposition (LoP) Lalchhandama Ralte chuan khuallian niin a hmanpui.
Khuallian chuan, “Tun hma kum 20 kal tate ngaihtuahin, Sakawrdai ngeia YMA Day kan hmang ta hi a lawmawm hle a. Hnama kan pianthar hnuah sap missionary hmasaten bul min lo tansak – YMA hlutna hi kan la hmu zel dawn a ni,” a ti.
YMA motto angin mi dangte tan malsawmna ni tur leh hunawl tha taka hmang turin kalkhawmte a infuih a. Sakawrdaia YMA Inkhawmpui 2025-a an lo pass tawh ang ziaziain Zofate hmasawnna kawngah chi bing leh hnam bil inlakhran tumna a awm loh nan leh inpumkhatna vawng nung reng turin tangrual turin a chah.
Motto-a ‘Kristian nun dan tha ngaihsan’ tih a nih rualin, YMA member-te chu ruihhlo laka fihlim tur leh kumpuan ‘Ruihhlo Do’ nasa zawka kalpui turin a chah a. Sakawrdai chu hmun pawimawh tak, state dang nena inkalpawhna a lo nih tak avangin ruihhlo tawlh a hluar phah ngei a hlawhthawnawm tih sawiin, ruihhlo donaah tha taka thawhho a ngaih thu a sawi a. Zirna kawngah pawh tan lak thar a ngaih thu sawiin LoP chuan, “Kan khawtlang hian zirna uar ila, hma kan sawn zel theih nan zirna hi a laimuah i dah ang u,” tiin mipui a sawm.
Sakawrdai Joint YMA-ah hian branch pali – Chhim Veng, Hmar Veng, Vengpui leh Upper Sakawrdai Branch-te an tel a. YMA Day lawmna hian chhun lamah hnam lam intihsiak leh infiamna hrang hrangin a zui a ni.