India chuan medical entrance exam pawimawh tak neih that leh a nih hmain Telegram app chu entawnna atana hman a nih theih avangin hun eng emaw chen atan a dang (block).
May thlaa exam neih tawh chu zawhna put ru a awm nia sawi a nih avanga thulh a nih hnuah zirlai maktaduai tam takin National Eligibility cum Entrance Test – Undergraduate (NEET-UG) chu June 21 hian an bei tha leh dawn a ni.
Exam buatsaihtu, National Testing Agency (NTA) chuan he hmalakna hi lawmawm an tih thu sawiin, ‘mi bumtute leh dik lo taka exam beitute inkara platform (Telegram) hman thin khap’ chu a tihtawpna tura tih a nih thu an sawi.
Internet hmangtute leh mihring dikna chanvo humhaltute chuan khapna hi an sawisel a, exam-a dik lo taka tihna lian tam hmachhawn nana ‘band-aid solution’ chauh a nih thu an sawi.
Sorkar-in a puan atanga darkar eng emaw zat hnuah pawh India-ah he platform hi hmangtute tan a la awm reng tho a, khuahkhirhna hi engtin nge kalpui a nih dawn tih a la chiang lo.
May 3 khan India rama centre 5,000 chuangah candidate maktaduai 2.28 vel an exam a; mahse, ni eng emaw zat hnuah NTA hian exam chu zawhna put ru a awm nia sawi a awm avanga thiah vek a nih thu a puang a, lungawi lo an tam hle.
He thubuai hi Central Bureau of Investigation (VBI)-in a chhui mek a, tun thlengin mi 20 chuang man an ni tawh.
NEET exam thiah a ni leh school-leaving exam pawimawh taka mark pek chungchanga buaina hran lo awm chuan ram pumah union education minister bân phuta nawrh huaihawt a nih phah.
Kum 2024 pawh khan NEET exam-ah hian candidate tam takin mark danglam tak tak an hmuh avangin zawhna put ru, bumna leh grace mark pek kawngah thil dik lo a awm nia sawi awmin mi tam tak thinurna a chhuak tawhi.
Thawhlehni khan NTA chuan India Ministry of Electronics & Information Technology chuan Telegram hnenah he app hi exam nawn a nih hnu, June 22 thleng India-ah hman theih lohna turin a hriattir tih a tar lang.
Ministry chuan India-ah June 30 thlenga message-editing feature chu disable turin app hi a ngen tih a sawi a, zawhna put finfiahna ‘siam chawp’ nan hman a nih thu a sawi bawk.
NTA-in app a dan chhan hi exam-a dik lo taka thil tih tihtawp a nih theih nana a tih a nih laiin mi tam tak chuan an sawisel nasa hle.
India-a digital rights advocacy organization, Internet Freedom Foundation (IFF) chuan danpui kalh a nih thu an sawi.