Aizawl: Social Welfare, Women & Child Development (SW, WC&D) Minister Lalrinpuii chuan Booth Mansion Conference Hall, Salvation Army Territorial Headquarter-ah, Beti Bachao Beti Padhao hnuaia Mizoram Postal Division leh WCD Department tangkawp hmalakna, hmeichhe naupang hmakhua ngaihtuahna ‘Project Thaichhawninu’ chu khuallian niin Thawhlehni khan a tlangzarh.
Minister Lalrinpuii chuan fanute chu ram leh hnam innghahna an nih avangin an hmakhua ngaihtuah chu nu leh pate mawhphurhna pawimawh ber a nih thu a sawi a. Mizo thawnthua Mauruangi nuin rethei chunga a fanu tana thaichhawn a ngaihtuah hram hram ang khan, tunlai nu leh paten Sukanya Samriddhi Yojana (SSY) account hmanga an fanute hmakhua an thlir ve thiam nan he project hi duan a ni tih a sawi.
Kum 10 la tling lo hmeichhe naupang nei zawng zawngte account hawnsak theuh turin minister chuan a chah a, kohhran, tlawmngai pawl, anganwadi Worker leh ASHA-te chu he hmalaknaah hian tanrualpuiah a sawm bawk.
He project hi Mizoram District 11 chhunga RD Block 27, ICDS huam chhungah kalpui tura ruahman a ni a, Post Office leh State Bank of India kaltlanga account hawnsak niin, Anganwadi Worker leh Postal Department thawktuten khaw tinah zirtirna leh account hawn runpui an nei dawn a, thla 10 chhungin kum 10 hnuai lam naupang 4,050 ziah luh hman an tum a ni.
Tunah hian Mizoram-ah hmeichhe naupang 18,560-in SSY account hi an nei tawh a, mahse kum 10 hnuai lam hmeichhe naupang nuai 1.5 chuang awm tura chhut a nih avangin tan lak a la ngai hle tih inkhawmah hian tar lan a ni.