Aizawl: Edenthar BSUP-ah Aizawl East District Sr. CMO office huaihawtin Thawhlehni khan ‘Stop Diarrhoea Campaign 2026’ hawnna neih a ni a. AMC Mayor H. Lalremtluanga chuan khuallian niin a hawng.
Aizawl Mayor H Lalremtluanga chuan kawthalo laka invenhim a pawimawhzia sawiin, kawthalo hi natna tlanglawn tak ni mah se, kum 2025 chhung khan India ramah naupang nuai 1.2 laiin kawthalo an thihpui chu pawi a tih thu a sawi a. “Kawthaloin nunna a suat thin chu umbo theih a ni a, heng atan hian inzirtirna kalpui zel a pawimawh,” a ti.
Aizawl Mayor chuan Sub-centre leh ASHA-te atangin ORS leh Zinc tablet a thlawnin lak theih reng a nih thu sawiin, sorkar department hrang hrang leh AMC-te chuan mipuite faina leh hriselna atan hma an lak zel tur thu a sawi bawk.
‘Kawthalo ven nan faina leh ORS a pawimawh’ tih thupui hmanga hman he campaign hi Ministry of Health & Family Welfare in naute leh naupang kawthalo avanga an thihna thleng thin chu tihtawp a nih theihna tura an hmalakna a ni a. Ram pum huapin June 16 atanga July 31, 2026 thleng hman a ni dawn a ni.