Aizawl: Excise & Narcotics Department chuan hmun hrang hrangah ruihhlo an man.
Thawhlehni tlai dar 4:55 khan Tuikual South, Temple Square, Aizawl-ah Heroin gram 241 (Hawng 20) leh a neitu nia puh – Gin Khan Sang (28) s/o Hau Khan Siam, Churachandpur, Manipur (tuna Chawnpui Veng, Aizawl-a Khawsa mek) nia inchhal an man.
Thawhlehni vek zan dar 11:15 khan Khatla, Aizawl-ah Heroin gram 350 (Hawng 30) leh heng heroin manaa inhnamhnawih leh a neitu nia puh mi pathum – Vanlallianzauva (33) S/o Lalruata, Haiheng, Falam District, Myanmar (tuna Zokhawthar, Champhai District, Mizoram-a khawsa mek); K. C. Lalrintluanga (38) S/o Lalrinmawia, Ramhlun South, Aizawl leh Lalhmangaihzuali (30) D/o Lallianthanga, Bawngkawn Brigade Veng, Aizawla khawsa nia inchhalte an man a, heroin phurhna atana hman Tata Intra V17 Truck (MZ01 AB-9551) pawh hrensak nghal an ni.
Excise & Narcotics Department leh FIU, 14th Bn. Assam Rifles thawkdun pawhin Thawhlehni zan dar 9:10 khan Tlangsam, Champhai-ah Methamphetamine tablet 9,786 (gram 950) leh a neitu nia puh mi pahnih – Lalramnghaka (30) s/o Thanvela leh Zosangzuala (38) s/o J. H. Vanlaldika, Zion Veng, Champhai-a khawsa ve ve nia inchhalte an man bawk.
Ruihhlo vanga mante hi The Narcotic Drugs & Psychotropic Substances Act, 1985 (NDPS Act) tlawhchhanin thubuai siamsak an ni a, Nilaini khan Courtah hruai nghal an ni.