Manchester United chuan West Ham United atanga Mateus Fernandes lak luh tumin hma an la dawn hnai niin thu a thang mek.
Nipui bazar inhawn chhungin Manchester United chuan central midfielder thar lak luh tumin hma an la mek a, Atalanta atangin £ maktaduai 38 sengin Ederson chu an lak luh hmasak ber a ni tawh nghe nghe.
Manager Michael Carrick-a erawh chuan he position-a khel tur hian pakhat aia tam lak luh a duh a. Casemiro contract a tawp hnua a chhuah tak vang leh Manuel Ugarte lakah rinna an hloh tawh vangin midfielder hi an zawng a ni.
United hi midfielder lar tak tak eng emaw zat nen sawi zawm an ni tawh a, Elliot Anderson chu an duh ber nia hriat a ni a. Nottingham Forest player hi sum tam tham lutuk senga lak luh erawh an tum bik lo va, Manchester City nena inbeihnaa luh an duh lo bawk.
City hian Forest neitu, Evangelos Marinakis hnenah £ maktaduai 105 laiin dilna lo theh lut tawh mah se an lo hnarsak a ni.
Hei vang hian United chuan player dang an melh leh ta zawk a, Fernandes chu 2025-26 season tawp lamah khan United target langsar zinga mi a rawn ni chho ta a ni.
West Ham hi season ni hnuhnung berah Championship-ah an tlak tak avangin Sir Jim Ratcliffe leh United hotute tan he inremna hi tihpuitlin a awlsam phah viau tura ngaih a ni.
West Ham chuan an player hi £ maktaduai 85 aia tlawm chuan chhuahtir an tum lo va, United tan sum tlem vak lo chu sen a ngai dawn a ni.