Aizawl: UD&PA Minister K. Sapdanga chuan Inrinni khan Lunglei tlawhin, Lunglei khawpui tihhmasawnna leh chei mawina atana hmin sa, hna thawh nghal mai tur, Rs nuai 5,387 hu a feh chhuahpui thu a sawi.
He thu hi Inrinni khan Lunglei Circuit House-ah Lunglei chanchin thar theh darhtute thingpui inpui paha an inkawmnaah a sawi a. Minister chuan heng project-te hi sorkar tana rulh leh ngai lo chi leh khawpui sum tuakna tur vek an nih avangin a phurawm hle tih a sawi.
K Sapdanga chuan State Priority Project (SPP) hnuaiah Rs nuai 1,750 hu project lian panga kalpui mek a nih thu sawiin, kum hnih chhung a man pe hlei thei lova lo awm tawh, Sazaikawna LMC Complex dinna tur ram man (Rs nuai 400) chu fun pheiin, Inrinni khan an pe tlak ta a, contractor thlan fel tawh niin hna an tan nghal dawn tih a sawi a. Hemi bakah hian Theiriata Transport Hub saknan Rs nuai 350, Ramthar AOC Market Shed saknan Rs nuai 200, C. Thuamluaia Mual bula Multi-Level Car Parking saknan Rs nuai 300 (an lai zo lek lek tawh) leh Saikuti Hall chei thatnan Rs nuai 500 dah a nih thu a sawi.
Urban Infrastructure Development Fund (UIDF) hnuaiah Rs nuai 525 dah a ni a, Lunglei Park chei thatnan rs nuai 200, hmun pali-ah vantlang inthiarna (pay and use toilet) siamnan Rs nuai 100 leh khawpui chhung footpath chei thatnan Rs nuai 225 dah a nih thu sawiin UD&PA Minister chuan a sawi a. SASCI Part-XB hnuaiah ward hrang hrang 80 hmasawnna hna thawhnan Rs nuai 200 dah a ni a, councillor ten an chan bial teuhvah an thawk tan thuai dawn tih a sawi bawk.
Chhim district pali dawl zo turin SASCI Part-V atangin Theriatah Rs nuai 1,400 sengin damdawi in bawlhhlawh tihralna ‘Common Bio-Medical Waste Treatment Facility’ din tum a ni a, ram neih fel tawhin tender buatsaih mek a ni. Hemi bakah hian kawr lian hlauhawm leh lei tawlh venna (storm drain) siam nan Lungleiah Rs nuai 250 dah a nih thu K Sapdanga hian a sawi.
Minister hi Adviser to CM Lalmuanpuia Punte, MLA leh UD&PA hotu lian ten an tawiawm a ni.