Aizawl: MPCC Senior Vice President Lalnunmawia Chuaungo chuan sorkar sum enkawl thiam loh avangin retheihna a nasat phah niin a sawi.
Inrinni khan Lalnunmawia CHuaungo hian Khawhai, Biate, Sialhawk leh a chhehvel khua te tlawhin, kuthnathawktute leh Congress party hruaitute nen an inkawm a. An inkawmnaah hian sorkar sum enkawl thiam loh avangin ram chhungah sum leh pai harsatna a thleng nasa hle tih sawiin, mi tlemte chauhin sum an hawp a, hei hian sualna leh retheihna a thlen nasa hle a ti a, Jail tang zaa 68.4 zet pawh retheihna vanga tang an nih thu Synod Prison Ministry zirchianna tar langin a sawi.
ZPM sorkar sawiselin dan anga kal duh, K. Sapdanga department chan DP&AR chu mi tute emaw kawng sialsak duhna vangin chief minister chanpual atan chhuhsak a ni a, ram rorelna tha beisei chi a nih lohzia a tichiang hle, a ti.
Lalnunmawia Chuaungo chuan BJP leadership a buai chhoh mek thu leh thalaite’n lungawi lohna an lantir reng takah chuan Congress tan kawl a en chhoh tak thu a sawi bawk.
Thingtlanga doctor indaih lohna sutkian a nih chhan chu Congress sorkar hmasain doctor zirna a lo din vang a ni tih sawiin MPCC Senior Vice President chuan, sorkarna an chan leh chuan zirna leh hriselna hmunhma te uar zawka thuam that an tum thu a sawi a. Congress Party chuan mi tin fai rel thleng phak sorkar siamin NLUP changtlung zawk kalpui an tum a, kuthnathawktute harsatna sukiang thei tur ruahmanna rintlak an siam mek tih a sawi.
MPCC leh MPYCC hruaituten Lalnunmawia Chuaungo hi an tawiawm a ni.