Aizawl: Aizawl Mihlun Thlahte Inkhawmpui Lian ‘High Council’ chu Inrinni khan Aijal Club-ah hman a ni.
He inkhawmpui lian hi Lok Sabha M.P, Richard Vanlalhmangaiha chuan khuallian niin a hmanpui a, Aizawl khawpui hian hmangaihtu leh neitu thinlung tak tak pu mi a mamawh thu a sawi a. Rel lo luh hnu phei chuan khualzinte’n Aizawl an tlawh nasat lehzual tawh avangin, khawpui mipuite chu kawng engkima inbuatsaiha hmasawnna lam hawia ngaihtuahna seng turin a sawm.
High Council hi an pawl Vice Chairman John Rotluangliana, ex-minister chuan a kaihruai a, General Secretary Vee Mathara hnen atangin pawl hmalakna chanchin ngaihthlak a nih bakah, an member mual liam ta mi 31 te hriatrengna hun hman a ni.
Pawl Chairman K. Liantlinga, Ex-MLA pawhin thu a sawi a. An member zinga ram hruaitu atana thlan thar Richard Vanlalhmangaiha, M.P leh A.M.C Corporator Dr. Lalmalsawma Nghaka te hnenah chawimawina thuziak hlan a ni bawk.
Hemi hnu hian agenda hrang hrang ngaihtuahin High Council rorelna an nei zui a, MJA General Headquarters kaihhruaiin kum 2026 atanga 2028 chhunga pawl hruaitu thlanna hun hman a ni.
He thlannaah hian hruaitu thar atan V. Lalnunthara (Mathara), K. Liantlinga, Dr. Vanlalruata, John Rotluangliana, K. Vanlalnghaka leh Zochhuanmawia te thlan chhuah an ni.
Aizawl Mihlun Thlahte pawl hi kum 1950 hmalama Aizawl khawpuia inbengbel tawhte tu leh faten June ni 21, 2017 khan V. Thanga In, Dawrpui-ah an lo din a ni a, tun dinhmunah hian member 1,666 an nei mek a ni.