Aizawl: Ministry of Finance buatsaih seminar hmanga Meghalaya khawpui Shillong-a kal, Mizoram Chief Minister Lalduhoma chuan Zirtawpni khan Mawdiangdiang-a NEIGRIHMS Hospital bula Mizoram sorkar damlo thlenna tura Patient Lodge sak mek a hmunah tlawhin, luah theiha buatsaih zui dan tur a en fiah.
He Patient Lodge sakna atan hian Rs vbc 4.19 ruahman a ni a, North Eastern Council (NEC) fund atanga thawh niin NEC hian fund zawng zawng an pe chhuak vek tawh a, tun dinhmunah hian project hi zaa 100 tling thuak tawhin khum 60 zet awm tura ruahman a ni.
Chief minister hovin sorkar official-te chuan NEC project-in a ken tel loh mamawh dang la awm, a hungna te, a kawt pavement te leh furniture leina tur thilte an sawi ho nghal a ni.
Hemi bakah hian NEIGRIHMS Hospital-a boralte chawlhpuina tur leh thlah liamna tur hmun an mamawh thu Shillong Mizo Welfare pawhin chief minister hnenah hian an lo thlen a, he hmuna thawktute chenna tur pawh sak a tul nia hriat an hriat thu an sawi a. Heng mamawh hrang hrang te hi PWD-in a man zat tur estimate leh proposal siamin Planning Department-ah rang taka thehlut turin an rel a, tui supply-na tur atan pawh Meghalaya sorkar chuan tui drill (laih) phalna a pek tawh avangin hma lak mek a nih thu an sawi.
He hunah hian chief minister hi NG Yirmayai, IES, Director (Health Sector), NEC bakah Mizoram sorkar Planning Department leh PWD official ten an tawiawm a ni.