Aizawl: Mumbai-ah Spa-a thawk tura hruai Kolasib district-a hmeichhe kumtlinglo pakhat chu June 18 khan West Bengal Nadya District Child Welfare ten Kolasib District Child Protection Unit kutah an hlan.
Thudawn danin kumin February 12 khan he hmeichhia hi Kolasib district-a hmeichhe pakhat leh Serchhip District-a cheng a thianpa te chuan Mumbai-ah Spa a thawk turin an hruai a, an chhuah hnu lawk February 14 khan West Bengal Police te chuan rel tlan an enfiahnaah hmeichhe naupang leh amah hruaitute pahnih hi an man a, a hruaitu pahnihte hi ‘human trafficking’ thubuai siamsak an ni.
He hmeichhe tleirawl hi thla khatah Rs. 12,000 hlawh turin an tiam nia sawi a ni a, a kalna senso leh kawng laka ei leh in zawng zawngte chu an tumsak vek bawk a ni.
Hei bakah hian May thla khan Uttarakhand-ah Mizoram atanga hmeichhia tleirawl panga chu Spa-a thawk tura hruai niin an taksa inzawrh luih tir an ni tawh a, he thilah hian mi paruk man an ni.
Tun tuma West Bengal Police-ten an mante hi an insawifiah zo lo va, tunah hian Nadya district-ah hren an ni.
Tleirawl hi June 18 khan Kolasib District Child Protection Unit kutah hlan a ni a, home lamah enkawl rih a ni ang.