Khawvel hmun dangte rualin Pathianni khan Mizoram hmun hrang hrang – District Hospital, Health & Welness Centre, zirna in leh pawl hrang hrangten an remchan dan ang zelin International Day of Yoga vawi 12-na hman a ni a. Kumin hian ‘Yoga for Healthy Ageing’ tih thupui hman niin, 34 Assam Rifles Helipad, Zokhawsangah National AYUSH Mission leh Directorate of AYUSH bultumin lawmna pui ber neih a ni.
He hun hmanpuitu khuallian Mizoram Larsap, General (Dr) Vijay Kumar Singh chuan Prime Minister Narendra Modi hmalaknain Yoga chu khawvelin a hriat phah hle a ni tih sawiin, UNO-in a pawmpui aia kum 12-na hmel a hmu ta chu lawmawm a tih thu a sawi.
Larsap chuan Yoga chu taksa hrisel nana thlan tih tlak ngawt tur a nih loh thu leh taksa leh rilru lam inrem taka siamtu a nih zawk thu sawiin, “Hun tam aiin tih dan phung dik a mamawh zawk a, boruak hip luh leh thawk chhuah mil zela chet lak a pawimawh a ni,” a ti.
Khualzahawm Health Minister Lalrinpuii pawhin thu sawiin, ni tin khawsak buai leh hah tak karah Yoga hian mihringte muanna leh rilru fim a pek bakah, taksa leh rilru sawizawina awlsam, mi tin banphak a nih thu a sawi.
Chief Secretary Khilli Ram Meena pawhin AYUSH kaltlangin mipuite hriselna sorkarin a ngaihpawimawh zia leh hma a lak zel dawn thu a sawi bawk.
Zokhawsanga hun hmanah hian Col Laldinpuia, Commandant, 34 Assam Rifles pawhin thu a sawi.
India ram puma International Day of Yoga 2026 lawmna pui ber, Red Road, Kolkata (West Bengal) a hman chu biak hmuh theihna (video conferencing) kaltlanga chhim niin, Prime Minister Narendra Modi thusawi ngaihthlak a ni.
Kumin thupui hian a tum ber chu rilru leh taksa hrisel tak nen upat hun hmang thei tura yoga chhawr tangkai a ni.
Yoga Crew, National AYUSH Mission-te kaihhruaiin ‘Common Yoga Protocol’ zawm zelin yoga exercise hrang hrang an ti a. He huna tel Assam Rifles, Mizo Air Sqn. NCC leh sorkar official 300 velte bakah, Mizoram District Hospital, Health & Wellness Centre leh zirna in hrang hrangah he ni hi an hmang a ni.