Aizawl: ZPM PAC member TBC Lalvenchhunga chuan, ZPM party-ah inluangrual lohna a awm lo tih sawiin, duhthusam ni bik lo mah se, sorkarna lo chelh tawhte ai chuan an thawk tha rih tho tho tih a sawi.
Thawhtannia ZPM pisaa party chhung inkhawmah thu sawiin Adviser to chief minister ni bawk, TBC Lalvenchhunga chuan, duhthusam ni bik lo mah se, sorkarna lo chelh tawhte ai chuan an thawk tha rih tho tho niin a sawi a. “Ngaihdan inang lo chu a awm thin a, mahse chu chu thil pangngai a ni a. ZPM party-ah inlungrual lohna awma min puhna chu a dik lo a ni,” a ti.
TBC Lalvenchhunga chuan, “Tun hnaiah a ngai tê bawkin ‘Pu Duha, Pu Sapa’ tih a ri leh tawh. He party-ah hian lungrual lohna a awm lo. PAC thu rel te a leak a, thu veivir ching, kan keh chhiat pawi ti lo hi chu an awm a ni. Kan keh chhe dawn lo, kan insiam tha zel zawk ang,” a ti bawk.
ZPM-ah chuan senior leh junior an awm lo tih sawiin TBC Lalvenchhunga chuan, ZPM chu an zavaia an siam tih a sawi a. Party mite chu mahni hmasialna leh duhamna tel lova ram leh hnam tana ngaihtuahna seng tura ngenin, CM leh Minister-te an mawi chuan an zavaiin an mawi a, thil dik lo an tih loh nana fimkhurpui turin party hruaitute an pawimawh a. Huaisen tura an inzirtirna te chu hre reng a, thil dik lo ti tura nawr lo turin party mite a chah.