Chief Minister Lalduhoma chuan CM Conference Hall-ah Dr. Krishan Kumar, MD, NHIDCL chu Mizorama NHIDCL hnathawh hrang hrangte thlirhona meeting a neihpui.
Thlirhona neihah hian Aizawl atanga Thenzawl Road chu National Highway-a siam tura DPR siamtu tur zawn mek a nih thu leh tender hi tun thla tawpa hawn a nih tur thu tar lang a ni a, Dr. Kumar chuan he kawng alignment hi kumin chhunga peih fel a, nakum lamah sanction neih hman an tum thu chief minister hi a hrilh a ni.
Chief minister chuan Seling leh Tipaimukh inkar National Highway-a Tuirini lei leh Tuivai lei chu a rang lama siam that a tul thu a sawi a, permanent bridge siam tur hian hun a mamawh rih dawn avangin tuna bridge awmsa hi a rang lama thuam that phawt nise tiin an rel a ni.
Meeting-ah hian NH-6 Vairengte leh Sairang kawngpui repair and maintenance chungchang te sawiho a ni a, Khamrang leh Sairang inkar siam that hna chu thawk zoin Kolasib lam section pawh an thawh zel thu leh nikum lama kawng harsatna ang kha kuminah chuan a thleng tawh lo tura an ngaih thu an sawi a, NH Tlabung atanga Kawrpuichhuah pawh NHIDCL kuta dah tawh tur a nih avangin rang taka tihfel thuai nise an ti bawk.
Vairengte leh Sairang/Aizawl inkar Four Lane National Highway hnathawh meka harsatna hrang hrang awmte leh Aizawl leh Tlabung inkar NH thawh mek chungchangte sawiin, heng harsatnate hi a rang lama chin fel dan tur an sawi nghal a, Thingfal khuaa biak in chim leh sikul sawn ngaite sak thatna tur DC Lunglei-in proposal a thehluh pawh Dr. Kumar hian a lo enchian tur thu a sawi.
National Highway laih tharin a hel tak, a hlui lo ni ta hmun thenkhat NHIDCL lamin one time improvement an tih hnua state PWD hnena hlan tur chungchang pawh sawi a ni a, NHIDCL lamin improvement an lo tih tawh sa te chu state sorkarah hlan nghal niin, a la tih loh te erawh NHIDCL hian an thawk phawt ang a, sorkarah an hlan dawn a, heng bakah hian hna an thawhna lama NHIDCL hmun hrang hranga harsatna an tawhte pawh hmalak nan an sawiho bawk.
Thawhtania thutkhawmah hian chief minister hi PWD Minister Vanlalhlana, EF&CC Minister Lalthansanga, Advisers to CM TBC Lalvenchhunga, H. Ginzalal leh Dr. Lorrain Lalpekliana Chinzah bakah official pawimawhten an tawiawm a, district hrang hranga DC leh CALA ten online-in an zawm ve bawk a ni.