Aizawl: Excise Minister Lalnghinglova Hmar chuan ruihhlo do kawngah sorkar leh tlawmngai pawlten hma nasa takin la tawh mah se, tun aia nasa zawka tan lak a ngaih thu a sawi.
‘International Day Against Drug Abuse and Illicit Trafficking’ pualin Thawhlehni khan Lianchhiari Conference Hall-ah ‘Emerging Trends and New Challenges Faced by Mizoram’ tih thupui hmangin seminar neih a ni. He hunah khuallian, Excise and Narcotics Minister Lalnghinglova Hmar chuan sorkar leh tlawmngai pawl hrang hrangten ruihhlo do chungchangah hma nasa takin lo la tawh mah se, tun aia nasa zawka tan lak a ngaih thu a sawi a. Mizoram chu ram zim leh mihring tlem an nih avangin an tanrual phawt chuan ruihhlo dona kawngah beisei tur lian tak a awm thu a sawi.
Social Welfare Director Sushil Singh chuan ruihhlo do kawngah Kohhran, sorkar leh khawtlang thawhhona a that avanga lawmawm a tih rualin inzirtirna kalpui zel a tul thu a sawi a; Excise Secretary C. Lalruaia pawhin ruihhlo do kawnga kalphung thar duan a, thiamna sang zawk hmanga inherrem zel a pawimawh thu a sawi bawk.
Seminar chhung hian ruihhlo dona kawnga hma la thin thiamna nei hrang hrangten supply reduction, medical care, demand reduction leh community perspective thupuia hmangin presentation pawimawh tak tak an nei a. Ruihhlo hluar zel laka inven dan tur sawihona leh zawhna leh chhanna hun hman a ni bawk.
He seminar hi Social Welfare Department, Mizoram Police, Excise, Assam Rifles, BSF, Central YMA leh pawl hrang hrang tangkawp buatsaih a ni.