Dawrpui khawtlang hruaitute Joint Committee chuan Thawhlehni khan Aizawl Press Club-ah thuthar thehdarhtute kawmin, an veng thenawm, Chhinga Veng nen ramri chungchangah buaina an nei chu pawi an tih thu an sawi a, hemi rual hian sorkarin Dawrpui veng chin a siam Gazette chu inches khat pawhin an tawlh dawn lo tih an sawi.
Dawrpui Joint Committee chuan an veng chhung ngeia Chhinga Veng |halai Pawl intiten hma an la chu mak an tiin an dem tih an sawi a. Chhinga Veng |halaiten buaina an siamna lai hi Dawrpui area ngei a nih thu sawiin, sorkarin khua leh veng ramri a siam Dawrpui ramri tar lanna, Gazette Vol XXIII Aizawl, Friday 29.04.1994, Vaisakha 9, S.E 1916 Issue no. 59 chu an innghahna ber a nih thu an sawi a. Chhinga Veng ramri tar lanna, Gazette Vol X Aizawl Friday, 22.01.1982 Magha 2, S.E 1903 Issue No.6-ah pawh helai hmun hi Chhinga Veng area a ni lo tih chiang taka a lan thu an sawi bawk.
Ramri buaina chungchangah Corporator leh DC te nena an inkawm tuk, June 17, 2026 khan Aizawl Mayor hovin thukhawm zuiin inremna kawng zawn ni se tih a nih angin ngawih an chuh zui tih sawiin Dawrpui khawtlang hruaitute chuan, “Kha thukhawmah khan keini Dawrpui veng aiawha telte chuan kan laka chet dan rawva lutuk hian kan rilru a tihnat hle chungin, ‘dan hnuaiah veng pahnihte hi inrem dan kawng zawn a tha e’ kan ti a; amaherawhchu, Chhinga Veng aiawha telten ‘Gazette kan pawm lo’ an ti kha sorkar thuchhuak zah lohna leh buai chhunzawm zel pawi tih lohnaah kan ngai a ni,” an ti.
Chhinga Veng lamin Dawrpui huam chhunga an thil tihchhiatte siam tha lo leh an signboard tarte Thawhlehni thlenga an la lak thlak loh avangin, ram hruaitute ngenna anga inremna kawng zawn chuan awmzia a nei lo nia an hriat thu an sawi a, Chhinga Veng |halaite chet dan hian Dawrpui veng mipuite a zah lovin rilru a ti na takzet a ni, an ti.
Dawrpui Joint Committee chuan sorkarin 1994 Gazette-a Dawrpui ram chin a siamah hian awm an duh ber thu leh, veng thenawmte nen dan hnuaiah inrem taka awm chu an duh ber reng a nih thu sawiin, a tul angin khawtlang chuan tharum ni lo vin, dan angin hma an la zel dawn tih an sawi bawk.