Mizo Zirlai Pawl chuan India ram pum huapa Election Commission of India (ECI)-in Special Intensive Revision (SIR) a kalpui mekah, SIR-in a behchhan, 2005 E-Roll leh roll thar ber, E-Roll 2024 an khaikhin atangin Chakma khua bikah vote punna a sang lutuk leh 2005 E-Roll-a khaw awm lo khaw 97 a awm thar tih sawiin, khaw 195 chungchangah Mizoram Chief Electoral Officer (CEO) hnenah complaint an theh lut dawn tih an sawi.
Thawhlehni khan Aizawl Press Club-ah thu thar thehdarhtute kawmin MZP hruaitute chuan SIR dik leh felfai taka kalpui a nih theihna turin, tun hma atanga foreigner pun chakna thin constituency thenkhata behchhan atana hman, kum 2005 E-Roll leh roll thar ber kum 2024 E-Roll te khaikhinin an enfiah a, hemi hnu hian Chakma khua bikah vote percent punna sang lutuk leh kum 2005 E-Roll-a khaw awm miah lo; mahse, kum 2024-a khaw 97 awm tharte chu an hmuchhuak tih an sawi.
India leh Bangladesh khua leh tui nihna nei kawp (dual citizenship) bakah E-Roll-a house number awm lo tam tak an hmuchhuak tih sawi bawkin MZP hruaitute chuan, heng thil dik lo an hmuhchhuahna khaw 195-te chungchang hi CEO hnenah complaint thehluh a ni dawn tih an sawi a. SIR kalpui mekah heng khaw 195-te hi en uluk leh zual turin an ngen a, hna hi kalpui a nih tawh pawhin DEO-te nen ngei ennawn leh turin leh, he hmalaknaah hian thuneitute a tul anga thawhpui an inhuam reng thu an sawi.
Bangladesh atanga Chakma foreigner lo lutten India khua leh tui nihna pawh nei loa E-Roll an rawn luahpui thin chu an vei hle tih sawiin, Chakma foreigner-te avanga Mizoram khua leh tui dik takten harsatna an tawk fo thin chu hriatthiam har an tih thu an sawi a. Dan lo anga E-Roll-a awm zawng zawngte paih vek turin Mizoram CEO, DEO, ERO leh AERO te chu an ngen nawn leh a, Booth Level Officer (BLO) te pawh rinawm leh dik taka thawk ngam tur leh, khua leh tui ni lote chu paih ngam turin an ngen bawk.
MZP hruaitute chuan December 1995-a E-Roll Intensive Revision neih tum khan Electoral Roll Officer leh a hnathawktute enpuiin Mizoram hmun hrang hrangah an lo feh chhuak tawh a, Chakma foreigner mi sing chuang teh meuh mai roll atangin an lo paih tawh a, Tlabung Constituency-ah phei chuan voter 4,000 chuang zet an lo paih tawh bakah, May, 1996 khan Chakma foreigner-ten Mizoram an chhuahsan nana nawrna atan Aizawl atanga Chawngte thleng ‘Long March’ an lo kalpui tawh tih an sawi bawk.