Thusawitu pakhat chuan, “Mahni fel intih lutuk hi a Pathian hnaih loh thlak,” a ti a. A dikin, kan ram dinhmun thlir hian kan ngaihsan leh duh zawng thlak a hun hlein a lang.
Thenkhat chu an tawng pung pung a, tawng ring leh hnamdang zinga awm ang maia phul hluah thin an awm bawk. Mizia a inang lo a, an demawm hran loh. Mahse, heng mite hian ngaihsan an hlawh ta zawk hlauh emaw ni chu aw, a tih theih a, kan hawiher hi thlak a hun hle.
Ram hruaitu an ni emaw, sorkar-a hna sang tak thawk an ni emaw a dang chuang lo e. Kan ngaihsan zawngte hi kan thlak a, thalaite hian midik leh nghet, kan hnamin mipa nunphung tur nia kan hriat putute kan ngaihsan thar a ngai hle.
Social media in nasa takin min luhchilh tawh a, kan kutzungpui hmangin, awmhmunah kan duh duh kan sawi thei tawh a, tawngkam chhe tak tak leh dawnsawn nuam lo tak tak sawi kan hreh lo a, chu chu tunlai khawvel nunphung tura ngaihna a lian tawh hle.
Mizote hi chutiang ti thin hnam kan ni ngai lo a, tai pawng pawnga tawng leh mipa phei chu tawng pung pung leh tawng ring, rak chiam chiam thin hnam kan ni lo.
Zonunzemawi ral ta ang lek leka kan thusawitu tam berin an sawi thin hi vei ila, tuaithar leh ila, mahni fel inti lutuk lo ila, midang thatna lai leh an tlin tawkna lai zawk zel hmuhsak turin i intuaithar tha leh ang u.