Aizawl: Mizoram Assembly Speaker Lalbiakzama leh KMMTTP & Railway Lines Study Team Chairman T. Lalhlimpuia, MLA te chuan Nilaini khan India leh Bangladesh inrinnaa awm, Asia khawmualpui chhak lam leh India-a land port lian ber ni bawk, ‘Integrated Check Post (ICP), Petrapole’ (West Bengal) an tlawh.
Mizoramin hmun pathuma ICP a neih ve dawn tak avangin, he tlawhna hi neih a ni a. He hunah hian ICP hi Mizo mipui, a bikin thalaite leh sumdawngten tangkai taka an hman thiam a tul thu leh, bungrua lakluh leh thawn chhuah kawnga inbuatsaih a pawimawh zia an sawi.
Study Team Chairman T. Lalhlimpuia chuan, nakkuma hawn tawh mai tur Kaladan Multi Modal Transit Transport Project (KMMTTP) leh rel kawng hian Mizoram khawtlang leh intodelhna kawnga nghawng a neih dan zir chiang tura sorkarin he committee hi a din a ni, a ti.
He hunah hian Land Port Manager Kamlesh Saini leh Custom Asst. Commissioner Avijit Bose (IRS) te chuan ICP hnathawh dan lo hrilhfiahin, Mizoram mite pawh sumdawnna thar mila inbuatsaih turin an chah a ni.