Aizawl: Darzo khuaa lei hnuaia tui hnar siam thatna leh tihchakna tur, ‘Groundwater Rejuvenation Project’ chu Nilaini khan Adviser to the Chief Minister (Finance & Planning) pisaah tlangzarh a ni.
He project hi Bharat Forge Limited Corporate Social Responsibility (CSR) sum hmanga kalpui tur a ni a, CII Foundation leh Darzo Village Council te tangkawpin an thawk dawn a ni.
He project hi Confederation of Indian Industry (CII) hnuaia thalai pawl, Young Indians (Yi) Mizoram Chapter-ten an enkawl dawn a. Yi Mizoram Chapter hi India ram pumah hetiang CSR project lian hlawhtling taka buaipui leh kalpuitu hmasa ber Yi Chapter an ni hial a. He hmalakna hi CII-in June 2025-a Mizorama CSR workshop a lo huaihawt atanga intan a ni.
Project tlangzarhna hun hi TBC Lalvenchhunga, MLA, Adviser to the Chief Minister leh Chairman, Mizoram CSR Cell ni bawk chuan khuallian niin a hmanpui a; Dr. Leena Deshpande, Vice President & Head – CSR, Bharat Forge Limited chu khual zahawm a ni.
He hunah hian project kalpuina tur chungchang tar langin, Bharat Forge Limited, CII Foundation leh Darzo VCP te chuan inremna (MoU) an ziak nghal a ni.
Khuallian TBC Lalvenchhunga chuan Mizoram hmasawnna tura CSR hmalakna pawimawh ziate sawiin, Bharat Forge Limited leh CII Foundation-te hmalakna chu fakawm a tih thu a sawi a, thingtlang khuaa tui harsatna sutkiannaah rah tha a chhuah ngei a beisei thu a sawi.
Khual zahawm Dr. Leena Deshpande pawhin Darzo khuaa tui hnar siam thar lehna project chu tual chhung mipui tan chhenfakawm leh tui humhalh kawnga entawn tlak a nih ngei a rin thu a sawi bawk.