Chief Minister Lalduhoma chuan Tourism Director R. Lalrodingi leh DP&AR department changtu thlak chungchang hian inzawmna a nei lo niin a sawi.
Chief minister chuan Tourism Director R. Lalrodingi rawih nawn leh K. Sapdanga chelh thin DP&AR Department, midang kuta hlan tak chungchang chu mi thenkhatin inkaihhnawihtir hram tum mah se, thil inzawmna nei lo hrim hrim a nih thuina thuthar thehdarhtute zawhna a chhang.
Chief minister sawi dan chuan DP&AR kalphung chungchang hi ZPM Political Affairs Committee (PAC) chuan kum 2024 khan an lo ngaihtuah tan daih tawh a, hemi hnu hian vawi eng emaw zat an thlirlet leh tawh a. PAC chuan department hna a muan thin avangin a thawktu pakhat sawn (siksawi) a tul tih thutlukna an lo siam tawh zawk thu a sawi a, khatih lai khan ‘DP&AR department hi CM-in chang se’ tih lam hrim hrim a awm lo a ni.
Lalduhoma chuan, “PAC duh dan kha a tir tê khan lo zawm ta ni se tun hi kan thleng lo ang. Mahse, PAC-in an thutlukna siam palzut leh a rei lutuk nia an hriat avang te, leh zirlai pawl (MZP leh MSU) ten hemi chungchanga ziaka an aw an chhuah tak avangin hetiang hian thutlukna an siam ta a ni,” tiin thu thar thehdarhtute a hrilh.
A sawi zel danin PAC duh ber chu DP&AR-a thawktu mal siksawi chiah a ni a, chu chu a hun laia lo tih mai ni ta se, department enkawltu (minister) thlak hi chu an tih a rin loh thu a sawi. Mahse, chu siksawi hna chu a thlen tak mai loh avangin a tawpah ‘department chu chief minister-in chang rawh se’ an tihphah ta nia a lan thu a sawi bawk.
Hemi chungchangah chief minister chuan, “Party mi ka ni a, party ta ka ni a, party duh dan anga awm tur ka ni,” tiin party thutlukna chu a zahawm tih a sawi.