Tottenham Hotspurs chuan West Ham atangin midfielder Mateus Fernandes chu an club player man to ber ni turin £ maktaduai 85-in an an la lut ta.
Kum 21 mi hi Spurs-a a cham hun tur sawi chian a ni lo va, Portugal tan vawi khat khel tawh mah se World Cup khelh mek squad-ah a tel ve lo thung.
Fernandes hian season hnih liamta chhung khan Premier League-ah Southampton leh West Ham-ah hun a hmang a, a club khelhnate hi Championship-ah tlakpui ve ve.
Spurs head coach Roberto de Zerbi chuan, “Mateus hi ka ngaihven rei tawh hle a, a chhan chu ball-a thatna leh kan khelh duh dana rang taka chet leh fing taka chet theihna a nei kawp a ni,” a ti.
“A kum zat anga en chi a ni lo va, Premier League-ah tawnhriat tha tak a nei tawh a, he level-ah hian a theihna leh a thiamna, a tlona a lantir tawh a ni,” a ti bawk.
“Mateus hi pressure hnuaiah pawh hahdam takin a khel thei a, hman lam panin ball a keng thei a, team tan a thawkrim a, hun harsaah pawh huaisen taka chet theihna a nei bawk a ni,” a ti a. “Hei hi kan hmasawnna chhunzawm zelna tura thil tha ber a nih ka ring a ni,” a ti.
Tottenham-in an lak hma hian Manchester United nen an inel a, Spurs-in a man atana pek an inhuam zat hi Old Trafford club hian an ngam ve lo va, a man hi pek belhchhah turte nen £ maktaduai 85 a ni dawn a ni.
Fernandes-a hi London hmar lam club hian Sandro Tonali lei tuma Newcastle an dilna hnawlsak an nih hnua tun nipui bazara an lak tum ber nia ngaih a ni a. Amaherawhchu, Spurs hian Italy midfielder lei nana £ maktaduai 100 thehchhuah pawh an rem ti nia sawi a awm leh tawh.
Spurs hi nipui bazar inhawng mekah hian an che chak hle a, Fernandes hi an player lak pangana a ni tawh.
A hmain goalkeeper Martin Dubravka bakah defender pathum – Marcos Senesi leh Andy Robertson leh Jan Paul van Hecke te an la lut tawh.
Fernandes chuan, “Rahbi thar atan hian ka phur hle a ni,” a ti a. “Spurs hi club lian tak an ni a, ka zawm chhanah head coach hi a pawimawh hle a ni,” a ti.
“Kan inbiak lai kha a danglam hle a. Football hi chutiang bawk chuan kan thlir a – team chak tak anga khelmual chhunga luh, beihna leh chakna nei, inkhelh apianga hnehna chan tum a ni,” a ti.