Chi leh chi inkara buaina chhuah nasatna, Manipur-a Kangpokpi district-ah Pathianni khan silai keng pawl hnih inkara inkah chhuakah Kuki nu kum 56 mi leh an fanuin hliam an tuar a. Hmun danga thil thlengah in pathum hal a ni bawk.
Police-te chuan tlai dar 5:10 vel khan Imphal-Silchar National Highway bula Thingkhogjang khuaah silai hmehpuah a ni tih an sawi.
Civil pawl, Kuki-Inpi Manipur (KIM) chuan pawikhawihna hi ‘rawng leh dawihzep’ tiin an dem thu an sawi a. He thil thlengah hian Naga hel pawl, National Socialist Council of Nagalim – Isak-Muivah (NSCN-IM) leh Zeliangrong United Front (ZUF) te chu mawhphurtuah an puh.
Thuneitute chuan inkahnaah hian Kuki pawl pahnih, Kuki National Front-Presidential Army (KNF-P) leh Kuki Revolutionary Army (KRA) te an tel tih an sawi ve thung a, sorkar nena inkah loh inremna (suspension of operations pact) ziak a ni a. KNF-P hian KRA camp pakhat an bei a, inkah a nih avangin nu leh a fanu kum riat miin hliam an tuar niin an sawi.
An pahnih hian Imphal-a Regional Institute of Medical Sciences Hospital-ah enkawl turin lak an ni a. Damdawi in thuneitute chuan an pahnih hian an malpuiah silaimuin a fuh ve ve a, an dinhmun a tha tih an sawi.
Hetih lai vel hian a bul hnaia Setjang khuaah in pathum vel hal a ni bawk.
KIM chuan police leh district thuneituten khaw tinah himna an pek a ngai tih an sawi a. “Manipur sorkar nen pawh Memorandum of Understanding siam a ni a, Kangpokpi district chhunga khua leh khaw mipuite himna chu district police-te mawhphurhna a ni ang a, Kuki-Zo volunteer-te chuan an khua an ven a ngai lo tih an sawi a. Chu inrinngamnate chu tunah chuan a chhe vek tawh a ni,” a ti.
Kuki pawl hian rang tak, langtlang, tumah thlei bik nei lo leh hun tiam chhunga chhui chian an phut bawk.
May 13-a Noney leh Kangpokpi-a inlambunna pahnih, kohhran hruaitu pathum leh Naga mi pakhat thihna a thlen hnuah Naga-Kuki inkara buaina hi a zual zel a. Naga-te hian nawrh an huaihawt a, national highway-te an dang a, Naga paruk ruang tihchhiat an hmuh a nih hnuah dikna chanvo an phut bawk.
Heng mi parukte hi May 13-a inlambun hnua Kuki leh Naga pawl hrang hrangin an rukbo leh an hren mi 48 zinga mi an ni a. Kuki leh Naga 14-te chu chhuah zalen an lo ni tawh.
Manipur-a hnam inkara buaina hi Meitei leh Kuki inkara intan niin tunah chuan hnam tin an inrawlh tawh a ni ber a. State chhunga Meitei leh Kuki-Zo hi Maym 2023-a an intihbuai atang khan an thununna hmun ve ve-ah an inkharkhip a, mi 260 vel an thi tawh a, mi 60,000 vel himna zawngin hmun dangah an insawn bawk.
Meitei-ho hi a tam zawk Hindu an ni a, Imphal phai ruamah an cheng ber a. Kristian tam zawkna, Kuki-te hi tlangah an cheng thung a. State sorkar chuan state chhungah hnam then darhtu buffer zone a awm lo tih sawi mah se hmun pawimawh thenkhat erawh a tar lang thung.
President’s Rule hman a nih atanga kum khat dawn a liam hnuah February thla khan sorkar thar din a ni a. Sorkar tharah hian hnam pathum – Kuki, Meitei leh Naga aiawhte an tel vek a ni.