Venezuelan information ministry-in a tarlan dan chuan an rama inzawn zata lirnghing vawi hnih thleng avanga thi zat chu mi 3,342 an tling tawh.
Pathianni (India-a Thawhtanni tuk)-a an dinhmun a tihchhuah tharah hian hliam tuar mi 16,470 a nih thu leh chenna nei lo zat chu mi 17,345 an tling tawh bawk.
An dinhmun tar lan a nih hma lawka Venezuela zalenna ni vawi 215-na hriatrengna puala thu a sawiah president lailawk, Delcy Rodriguez-i chuan mi tam takin chhiatna thlena an chet chhuah hun tlai leh hma la tha tawk lo nia an sawi avanga mipui lungawi lohna a pun zel laiin sorkar hmalakna chu tha tawk a tih thu a sawi.
Rodriguez-i chuan venhim hna thawktute a dah nghal tih a sawi a, sipai unit thar siam a nih tur thu a puang bawk a. Hei hian rikrum leh chhiatrupna thleng thinte hmachhawn turin a pui dawn tih a ni.
Venezuela-a lirnghing hi June 24-a thleng kha niin an rama tlai dar 6:04 velah a hmasa zawk, magnitude 7.2-a nain a sawi a. Second 39 chauh a liam hnuah magnitude 7.5-a na leh chak zawkin a sawi chhunzawm leh a. San Felipe chhim lam, Veroes Municipality-ah a intan ve ve a ni.
An khawpui Caracas leh a chhehvel hnai chu a tuar na ber zinga mi an ni.