Mizo Hmeichhe Insuihkhawm Pawl (MHIP) din champha vawi 52-na chu Thawhtanni khan Mizoram hmun hrang hrangah lawm a ni a. An pawl general headquarters hruaitute chuan branch hrang hrangah an hmanpui a, ram hruaitute pawhin hmun thenkhatah an hmanpui bawk.
MHIP General Hqrs. President Lalliani chuan Khatla Branch-ah hmanpuiin MHIP Day vawi 52-na puallin Mizo mipuite chibai a buk a. Tun aia Mizo hmeichhiaten hma an sawn leh zual theihna turin mi tin an pawimawh thu a sawi a, hmeichhiate zingah a tlingte chu induhsaka a theih ang anga inhlan kai nachang hriat a tul thu sawiin, MHIP thil tum ber, ‘Mite Tanpui’ a nih anga MHIP Day puala mi dangte tan malsawmna thlentu ni theuh turin Mizo hmeichhiate a sawm bawk.
MHIP president hian Central YMA-in ruihhlo an do chu an pawlin an thlawp thu sawiin an member zawng zawngte pawh ‘Mizoram hmelma lian’ ruihhlo do kawngah theihtawp chhuah zel turin a chah a. Hmeichhia zawng zawngte ruihhlo leh a kaihhnawih laka inthiarfihlim turin a ngen bawk.
Khatla MHIP Day lawmnaah hian AMC Ward XIV Corporator Roy Lalhriatpuia chuan Lalliani leh mi dang pathumte Khatla Branch khawtlang tana thahnem an ngaihna leh an thawhthatna avangin chawmawina a hlan nghe nghe.
Aizawl khawpui huam chhunga golden jubilee lawm thei hmasa ber, Tlangnuam Branch MHIP chuan an jubilee pualin Community Hall-ah hun an hmang.
Jubliee lawmnaah hian Aizawl South II MLA, an veng pa ni bawk, Lalchhuanthanga chu khuallian niin Jubilee Lungphun a hawng a, MHIP General Headquarters President Lalliani chu khual zahawm niin jubille pual souvenir chu Ward XIX Corporator Dr. Lalmalsawma Nghaka’n a tlangzarh a. Jubilee lawmna ruai kilho a ni bawk.
Aizawl khawpui pawn branch MHIP-ah chuan golden jubilee lawm tawh branch an awm nual thung.
Siaha-ah chuan MADC Golden Jubilee Hall, MADC Conplex, Council Vaih, Siaha-ah MHIP dinchamphaphak vawi 52-na hi hman a ni a. MADC-a Member of District Council (MDC) ST Vanmalsawmliana’n a hmanpui.
Siaha MHIP Sub-hq President H. Lalawii kaihruaina inkhawmah hian khuallian chuan nute chu inchhungkhur enkawl kawnga an pawimawh thu sawiin ram leh hnam dinchhuahna tur kawnga an hlu tak zet tih a sawi a. Mizote chu hnam tlem tê an nih thusawiin fa neih tam inzirtir kawnga tan lak a pawimawh thu leh chhungkua leh ram tan hnathawk a tan la zual sauh sauh turin kalkhawmte a sawm.
Khual zahawm, District Social Welfare Officer LS Lalbiakzuali pawhin thu sawiin hmeichhiate chu chhungkua leh khawtlangah mipa nen mawhphurhna hran an nei tih sawiiin inchhungkhur enkawl felfai chu nu mawhphurhnaah tam tak a innghat tih a sawi.