Justin Gaethje chuan kum a la hman mekah hlawhtlinna lian tak pakhat a hlawh chhuak leh ta a. MMA Fighting chuan ‘Fighter of the Midyear’ atan UFC lightweight champion hi an thlang a, hei hi kumin chanve hmasa lama a career rawn thlak danglam hlawk khawpa a khelh that avanga chawimawina a ni.
Kum 37 mi hian mi a hneh satliah ngawt lo va. He infiamnain kum tam tak chhunga a hmuh tawh ‘comeback’ chanchin ropui ber zinga mi a rawn lantir a ni.
Chawimawina hi amah ringhleltute pawh hmin thei khawpa hlawhtlinna lian tak pahnih a neih hnuah a dawng a. A chakna pakhat chuan UFC record buah hmun a luahtir a, a dang lehah phei chuan UFC zan ropui bera ngaih pakhatah undisputed lightweight title kengin a haw thei hial a ni.
A hlawhtlinna kawng lian hmasa zawk chu kumin tir lama interim lightweight championship atana Paddy Pimblett a hneh tum kha a ni a. He hlawhtlinna avang hian UFC chanchinah interim title pahnih la thei hmasa ber a ni a, a career chhuanawm sa tak mai chu a rawn belh chhah leh a ni.
Chumi hnuah June thla khan UFC White House-ah a theihna sang zawk a rawn pho chhuak leh a. Pound-for-pound No. 2 ni thin, Ilia Topuria hmachhawnin Gaethje chuan kumin chhunga ‘upset’ ropui bera ngaih theih hial turin hnehna a chang a. Lightweight champion hian Fight of the Year ni thei tur khawpa innuainaah Topuria hi hnehin undisputed belt nen a haw ta a ni.
He thutlukna siam chhan sawi fiahin MMA Fighting mi, Jed Meshew chuan, “Justin Gaethje khan a khel tha tak zet a, Fight of the Year ni thei tur khawpa inlanin Topuria a hneh a, UFC chanchina upset ropui ber zinga mi a rawn thehlut a, chung zawng zawng chu theih anga stage ropui berah a la ti zui,” tiin a ziak.