Aizawl: Mizorama political party-te chuan electoral roll Special Intensive Revision (SIR) 2026 draft roll chhuak taa kum 2025 e-roll-a chuang si, kum 2005-a zawmpui nei lote chu paih vek tha an ti.
Political party hrang hrangte hi Thawhlehni khan Adviser to Chief Minister (Political) Lalmuanpuia Punte hovin Election Commission of India thupek anga SIR kal mekah Mizoram chhunga voter paih leh belh chungchangah inrawnkhawmna an nei.
All Political Party Meet on SIR, 2026-in resolution an siamah ‘No linkage with last SIR’ category-a awm, chhinchhiahna ‘Sen’-a awmte chu a nihna ang taka paih vek tha an ti tih an tar lang.
Chhinchhiahna ‘Eng’-a chuang, rinhlelhawm deuha langte chu fimkhur leh uluk taka All NGO nen umzui zel tha an ti bawk
SIR 2026 kal mekah hian party tinten lungrual taka hma laka inrawntawnna neih zel tha an ti a, All NGO hmalakna pawh tha an ti a, an thlawp tlat thu resolution-ah hian tar lan a ni.
SIR kalpui mekah hian Inrinni khan draft roll hio tihchhuah a ni a. All party meet resolution-ah hian Lalfakzuala Hauzel, State General Secretary, BJP; VL Krosshnehzova, General Secretary, MNF; TT Zothansanga, PAC Member, MPCC leh Saithuama Mangpa, PAC Member, ZPM ten hming an ziah hnan a ni.